سوال: حضرت! مندرجہ ذیل حدیث کی تصدیق اور تشریح فرمادیں: رسول اللہ ﷺ نے فرمایا: جمعہ کے دن میں ایک ساعت (گھڑی) ایسی ہے کہ کوئی مسلمان اس ساعت کو پا کر اللّٰہ تعالیٰ سے مانگتا ہے تو اللہ اسے ضرور دیتا ہے،لہٰذا تم اسے عصر کے بعد آخری ساعت (گھڑی) میں تلاش کرو۔

جواب: جی ہاں! سوال میں مذکور حدیث سنن ترمذی میں موجود ہے، ذیل میں اس روایت کا ترجمہ ذکر کیا جاتا ہے۔
ترجمہ: انس بن مالک ؓ سے روایت ہے کہ نبی اکرم ﷺ نے فرمایا : ’’جمعہ کے روز اس گھڑی کو جس میں دعا کی قبولیت کی امید کی جاتی ہے عصر سے لے کر سورج ڈوبنے تک کے درمیان تلاش کرو‘‘۔ (ترمذی، حدیث نمبر:489)
تشریح:
حضرت ابوہریرہ رضی اللہ عنہ سے منقول ہے کہ جناب نبی کریم ﷺ نے ‏ارشاد فرمایا:‏ "جمعہ ‏کے دن ایک گھڑی ایسی ہوتی ہے کہ اگر کسی مسلمان شخص کو حسن اتفاق سے وہ میسر آجائے (اور) وہ اس میں اللہ ‏تعالیٰ سے خیر کی دعا کرے تو اللہ تعالیٰ اسے (اس کی مانگی ہوئی) وہ چیز عطا فرما دیتے ہیں"۔ (صحيح مسلم، حدیث نمبر: 852)‏
اس حدیث سے یہ بات معلوم ہوئی کہ جمعہ کے دن ایک گھڑی ایسی ہے کہ بندہ اس میں اللہ تعالیٰ سے جو دعا مانگے تو اللہ تعالیٰ وہ دعا قبول کرتے ہیں، لیکن یہ گھڑی کس وقت ہوتی ہے؟ اس میں کئی اقوال ہیں، جن میں سے دو زیادہ مشہور ہیں: (1) سوال میں مذکور حدیث سے معلوم ہوتا ہے کہ یہ وقت جمعے کے دن عصر کی نماز سے لے کر غروب آفتاب تک رہتا ہے۔ (2) صحیح مسلم کی حدیث سے معلوم ہوتا ہے کہ امام جب خطبہ کے لیے بیٹھتا ہے، اس وقت سے لے کر نماز سے فارغ ہونے تک یہ وقت رہتا ہے۔ چنانچہ حدیث شریف میں ہے کہ ابو بردہ بن ابی موسیٰ اشعری رضی اللہ عنہ سے روایت ہے کہ مجھ سے حضرت عبد اللہ بن عمر رضی اللہ عنہ نے کہا: کیا تم نے اپنے والد کو جمعے کی گھڑی کے بارے میں رسول اللہ صلی اللہ علیہ وسلم سے حدیث بیان کرتے ہوئے سنا ہے؟ میں نے کہا: جی ہاں میں نے انہیں یہ کہتے سنا ہے کہ میں نے رسول اللہ صلی اللہ علیہ وسلم سے سنا آپ ﷺ فرما رہے تھے: "یہ امام کے بیٹھنے سے لے کر نماز مکمل ہونے تک ہے۔ (صحیح مسلم، حدیث نمبر: 853)
خلاصہ کلام:
بہرحال جمعہ کے دن عصر سے مغرب تک تو دعا و ذکر کا اہتمام ہونا چاہیے، ساتھ ساتھ جمعہ کی نماز کے خطبہ سے لے کر نماز سے فارغ ہونے تک بھی اگر امکانِ دعا ہو تو اس کا اہتمام کرلینا چاہیے، لیکن اس وقت دل ہی دل ‏میں دعا ‏مانگنی چاہیے، زبان سے یا ہاتھ اٹھا کر دعا نہ مانگی جائے۔