سوال: السلام علیکم،
حضرت ! بیٹے نے ماں کی قربانی کی نیت سے جانور خریدا، اور والدہ قربانی سے پہلے فوت ہوگئیں تو قربانی کے گوشت کی تقسیم کیسے ہوگی؟

جواب: واضح رہے کہ قربانی کے شرکاء میں سے کسی ایک کا قربانی سے پہلے انتقال ہوجائے، تو اس کے ذمہ سے قربانی ساقط ہو جاتی ہے اور اس جانور کے مالک ورثاء ہو جاتے ہیں، چاہے تو وہ قربانی کریں، چاہے وہ قربانی نہ کریں، ان کی اپنی مرضی ہے، البتہ اس کے بالغ ورثاء اگر اپنی خوشی سے مرحوم کی طرف سے قربانی کر دیں، تو مرحوم کو قربانی کا ثواب ملے گا اور گوشت ورثاء کی ملکیت ہوگا، اس صورت میں جیسے وہ اپنی قربانی کے گوشت کو تین حصوں میں تقسیم کرتے ہیں، ایسے ہی وہ مرحوم کی قربانی کے گوشت کو تین حصوں میں تقسیم کر سکتے ہیں۔