سوال: ہم نے بچی کے پیدائش کے ساتویں دن ایک رفاہی ادارہ میں عقیقہ کے بکرے کے پیسے جمع کروائے کہ عقیقہ کی نیت سے جانور ذبح کرکے غریبوں کو کھلادیں، لیکن جب دوسرے دن ان سے معلوم کیا تو انہوں نے کہا کہ صدقہ کی نیت سے بکرا ذبح کیا ہے۔ معلوم یہ کرنا ہے کہ اب کیا دوبارہ عقیقہ کرنا ہوگا اور اگر دوبارہ کرنا ہوگا تو کس دن کریں؟
تنقیح: محترم اس بات کی وضاحت کردیں کہ ان لوگوں نے بکری عقیقہ کی نیت سے خرید کر صدقہ کی مد میں قربان کیا ہے یا صدقہ ہی کی نیت خرید کر پھر صدقہ کی مد میں ذبح کیا ہے۔ اس وضاحت کے بعد آپ کے سوال کا جواب دیا جاسکے گا۔
جواب تنقیح:
ان کا کہنا ہے کہ بکرے کی سلیپ ہم سے پیسے لے کر عقیقہ کی مد میں ہی بنائی تھی، اس کے بعد ان کے آفس میں انٹری ہوئی کہ یہ رقم اس بچی کے نام پرعقیقہ کے لیے آئی ہے۔ مزید ان کا کہنا تھا کہ صدقہ کے بکرے کی قیمت کم ہوتی ہے اور عقیقہ کے بکرے کی قیمت زیادہ ہوتی ہے، انہوں نے غلطی سے ہم سے کم رقم چارج کرلی تھی، اس لیے انہوں نے عقیقہ کی مد میں قربانی نہیں کی، اب کیا ہمیں دوبارہ عقیقہ کی مد میں قربانی کرنی ہوگی؟

جواب: پوچھی گئی صورت میں چونکہ آپ نے مذکورہ ادارے کو عقیقہ کی مد میں بکرا ذبح کرنے کا وکیل بنایا تھا، لیکن انہوں نے عقیقہ کی مد کے بجائے عام صدقہ کی مد میں جانور کو ذبح کرکے آپ کی بات کی رعایت نہیں رکھی، جبکہ وکیل کے لیے اپنے مؤکل (وکیل بنانے والے ) کی بات کی رعایت رکھنا ضروری ہوتا ہے، بصورت دیگر اس کا کیا ہوا عمل مؤکل کے حق میں معتبر نہیں ہوتا، بلکہ خود وکیل کے حق میں نافذ ہو جاتا ہے، نیز عقیقہ کے لیے مطلوبہ رقم سے کم رقم کاٹنے کی وجہ سے انہوں نے جو جانور ذبح کیا ہوگا، غالب گمان یہی ہے کہ اس جانور میں عقیقہ کی شرائط نہیں پائی گئی ہوں گی، کیونکہ رفاہی اداروں میں عموماً اسی لیے صدقہ اور عقیقہ کے جانوروں کی قیمتوں میں فرق رکھا جاتا ہے، یہی وجہ ہے کہ کم قیمت کی وجہ سے انہوں نے اس کو عقیقہ کے بجائے صدقہ کی مد میں ذبح کیا ہے۔
لہذا ادارے کی طرف سے آپ کی بات کی رعایت نہ رکھنے کی وجہ سے بچی کا عقیقہ ادا نہیں ہوا ہے، لیکن عقیقہ کرنا چونکہ کوئی فرض یا واجب نہیں ہے، اس لیے بچی کی طرف سے مزید عقیقہ کرنے کی گنجائش نہ ہو تو دوبارہ عقیقہ کرنا ضروری نہیں ہے، البتہ اگر گنجائش ہو تو عقیقہ کرنا بہتر ہے تاکہ اس کے فضائل و برکات حاصل ہوجائیں۔
واضح رہے کہ مذکورہ ادارے نے چونکہ آپ کی بات کی رعایت نہیں رکھی ہے، لہذا عقیقہ کی مد میں جمع کرائی گئی رقم کے مطالبہ کا حق آپ کو حاصل ہے، البتہ اگر آپ چاہیں تو باہمی رضامندی سے عقیقہ کے لیے مطلوبہ رقم پوری کرنے کے لیے اس کے ساتھ مزید رقم جمع کرا کے بچی کی طرف سے از سر نو عقیقہ بھی کروا سکتے ہیں۔