سوال: نبی کریم ﷺ نے فرمایا: "یہود اور نصاریٰ (بالوں کو) رنگ نہیں لگاتے تم ان کی مخالفت کرو (بالوں کو رنگ لگاؤ) (صحیح مسلم، حدیث نمبر:2103) مفتی صاحب! کیا مندرجہ بالا حدیث صحیح ہے؟

جواب: جی ہاں! یہ حدیث صحیح ہے اور صحیح مسلم میں موجود ہے، ذیل میں اس حدیث کا ترجمہ اور تشریح ذکر کی جاتی ہے:
حضرت ابو ہریرۃ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: "یہود اور نصاریٰ (بالوں کو) رنگ نہیں لگاتے تم ان کی مخالفت کرو (بالوں کو رنگ لگاؤ) (صحیح مسلم، حدیث نمبر:2103)
تشریح:
واضح رہے کہ بڑھاپے کی وجہ سے بال سفید ہونے کی صورت میں بالوں پر رنگ لگانا مستحب ہے، لیکن ایسا کرنا لازم اور ضروری نہیں ہے، لہذا اگر کوئی بالوں کو سفید رکھنا چاہے تو شرعاً اس میں کوئی حرج نہیں ہے، البتہ رنگ لگانے کی صورت میں سرخ رنگ لگانا مسنون ہے، جبکہ کالا رنگ لگانا ممنوع اور ناجائز ہے۔
"یہاں سوال یہ پیدا ہوتا ہے کہ جب خضاب کرنا اتنا ضروری ہے اور یہود سے مخالفت کا ذریعہ ہے تو اس سے یہ ثابت ہوا کہ خضاب کے بغیر سفید بالوں کو سفید چھوڑنا منع ہے، حالانکہ زیادہ تر مسلمان (بالوں پر) رنگ نہیں کرتے، بلکہ طبعی حالت پر (داڑھی اور سر کے) بال سفید رکھتے ہیں۔
اس اعتراض کا جواب یہ ہے کہ حدیث کا مطلب یہ ہے کہ یہود کسی بھی رنگ اور خضاب کو جائز نہیں سمجھتے، تم خضاب کو ناجائز نہ سمجھو، بلکہ یہود کی مخالفت کرکے جائز ہونے کا عقیدہ رکھو، پھر خضاب کرو تو بھی جائز اور اچھا ہے اور خضاب نہ کرو بلکہ طبعی حالت پر چھوڑ دو، یہ بھی جائز اور اچھا ہے۔" (تحفة المنعم، 581/6، مکتبہ ایمان و یقین)