سوال: مفتی صاحب! علی نے عمر سے قرضے کے طور پر کچھ پیسے مانگے، اس وقت اس کے پاس پیسے نہیں تھے تو اس نے ساڑھے تین تولہ سونا دیا اس شرط پر کہ سونے کے بدلے سونا ہی قرضے میں واپس کرے، اس وقت سونے کی قیمت ایک لاکھ تک تھی، اس نے بیچا تواس کو تین لاکھ اسی ہزار ملے جس سے اس نے اپنا کاروبار شروع کیا، پھر تین سالوں میں سونے کی قیمت ایک لاکھ کے بجائے ڈھائی لاکھ ہوگئی اور وہ جو تین لاکھ کا سونا تھا، اب اس سال اس کو وہ تین تولہ ساڑھے آٹھ لاکھ تک کا پڑ رہا ہے تو علی نے عمر سے کہا کہ تم اتنے نہیں ادا کر پاؤ گے تو اگر چاہو تو صرف پانچ لاکھ تک پیسے دے دو اور چاہو تو ایک ایک تولہ کر کے صرف تین تولہ واپس کر دینا باقی رہنے دو۔ مسئلہ یہ پوچھنا تھا کہ کیا ایسا کرنا جائز ہے یا کمی بیشی کرنا سود میں شمار ہوگا؟

جواب: واضح رہے کہ قرض کے بارے میں شرعی اصول یہ ہے کہ قرض میں جو چیز جتنی مقدار میں لی جائے، واپسی میں اتنی ہی مقدار میں وہ چیز دینا ضروری ہوتا ہے، قرض دیتے وقت اس میں کمی بیشی کی شرط لگانا سود کی وجہ سے ناجائز ہوتا ہے، البتہ قرض دیتے وقت کمی بیشی کی شرط لگائے بغیر اگر قرض دینے والا بعد میں اپنی خوشی اور رضامندی سے مطلوبہ چیز کے بجائے اس سے کم مقدار میں کوئی اور چیز یا وہی چیز مطلوبہ مقدار سے کم واپس لینا چاہے تو اس کی اجازت ہے۔
پوچھی گئی صورت میں اگر ابتداءً کمی بیشی وغیرہ کی شرط لگائے بغیر علی اپنی خوشی اور رضامندی سے ساڑھے تین تولہ سونے کے بجائے پانچ لاکھ روپے (جو آج کل کے حساب سے تین تولہ سونا کی قیمت سے کم ہے) یا تین تولہ سونا لے رہا ہے تو یہ جائز ہے، بلکہ علی کی طرف سے یہ خیر خواہی اور بھلائی شمار ہوگی، اور ان شاء اللہ علی اللہ تعالیٰ کے ہاں اجر کا مستحق ہوگا۔