سوال: ایک آدمی نے بیوی کو طلاق دینے کے لیے اپنے اور دو گواہوں کے دستخطوں کے ساتھ ایڈمنسٹریٹر یونین کونسل کے نام طلاق کا نوٹس بنوایا اور اس کی تصویر پاکستان میں موجود اہلیہ کو واٹس ایپ کر دی جس کی تحریر یہ تھی کہ میں (آگے اس نے اپنا نام ولدیت وغیرہ لکھی) اپنی بیوی (آگے اس نے بیوی کا نام وغیرہ لکھا) کو تحریری زبانی طلاق آج مورخہ (تاریخ نہیں لکھی) کو دے کر اس کا علان روبرو گواہان کر دیا ہے، لہذا علان کی اطلاع ایڈمنسٹریٹر صاحب کو پیش کرتا ہوں تاکہ قانون کے مطابق کارروائی عمل میں لائی جائے۔
خاتون کو واٹس ایپ کے ذریعے نوٹس ملے تقریباً چار مہینے ہو چکے ہیں، لیکن خاندان کے کچھ لوگ کہتے ہیں کہ طلاق ہوئی ہی نہیں، یہ محض ایک نوٹس ہے، طلاق نہیں ہے، اس لیے صلح کر لیں، جبکہ خاتون اور اس کے گھر والے کہتے ہیں کہ طلاق ہو چکی اور رجوع کا وقت بھی گزر چکا، اب صلح نہیں ہو سکتی۔ برائے مہربانی اس پر رہنمائی فرمائیں شکریہ

جواب: واضح رہے کہ زبانی طلاق کی طرح تحریری طور پر طلاق کے الفاظ لکھنے یا کسی اور سے لکھوانے سے بھی شرعاً طلاق واقع ہو جاتی ہے، سوال میں ذکر کردہ الفاظ چونکہ طلاق کے الفاظ ہیں، اس لیے اگر طلاق نامہ میں صرف ایک طلاق کا ذکر ہو تو ان الفاظ سے مذکورہ شخص کی بیوی پر ایک طلاق رجعی واقع ہوگئی ہے، اب اگر شوہر نے اس کے علاوہ کوئی اور تحریری یا زبانی طلاق نہیں دی ہو تو عدت کے زمانے میں شوہر رجوع کرسکتا ہے، لیکن اگر طلاق رجعی کے بعد عدت کا زمانہ گزر گیا ہو تو اب شوہر رجوع نہیں کرسکتا، البتہ میاں بیوی باہمی رضامندی سے نئے مہر کے ساتھ دوبارہ نکاح کرسکتے ہیں، دوبارہ نکاح کرنے کی صورت میں شوہر کے پاس مزید صرف دو طلاقوں کا اختیار باقی رہے گا۔
اور اگر طلاق نامہ میں تین طلاقوں کا ذکر ہو یا طلاق نامہ میں تو ایک کا ذکر ہو، لیکن شوہر اس سے پہلے کسی اور واقعہ میں دو طلاقیں دے چکا ہو تو اس صورت میں اس کی بیوی (تین طلاقیں واقع ہونے کی وجہ سے) اس پر حرام ہوگئی ہے، اب رجوع اور تجدید نکاح کی کوئی صورت ممکن نہیں ہے، یہاں تک کہ یہ عورت کسی اور مرد سے نکاح نہ کرلے اور اس کے ساتھ حقوق زوجیت ادا نہ کرلے، پھر اگر وہ طلاق دیدے یا اس کا انتقال ہو جائے تو عدت گزرنے کے بعد طرفین کی رضامندی سے نئے مہر اور دو گواہوں کی موجودگی میں اس سابقہ شوہر سے دوبارہ نکاح کیا جا سکتا ہے۔