سوال: ایک خاتون 2008 میں بیوہ ہوئی تو کچھ باثر لوگوں کے اصرار، تعاون اور رہنمائی سے مذکورہ خاتون نے مبلغ تین لاکھ روپے پاکستان پوسٹ آفس یعنی سرکاری ڈاکخانہ میں فکس کروائے اور اس پر جو سالانہ منافع ملتا تھا، اس سے اپنے بچوں کی اسی ادارے سے انشورنس بھی کروالی۔ یہ سلسلہ پندرہ سولہ سال چلتا رہا اور اب وہ انشورنس کا دورانیہ اپنی تکمیل کو پہنچنے والا ہے، اس خاتون کو انشورنس کی مد میں تقریباً گیارہ لاکھ روپے ملنے کی امید ہے، جس میں اصل رقم ملا کر یہ رقم چودہ لاکھ روپے بن جائے گی۔ مذکورہ خاتون کے دو بچے ہیں جوکہ پڑھائی کرتے ہیں اور گھر کے معاشی حالات بہت اچھے نہیں ہیں۔
معلوم یہ کرنا ہے کہ اس رقم کی شرعی حیثیت کیا ہے یعنی حلال ہے یہ حرام؟ اگر حرام ہے تو کیا کوئی حیلہ شرعی ہے کہ جس کے ذریعے مذکورہ خاتون اس رقم کواپنی حاجتِ اصلیہ میں استعمال کرسکے؟

جواب: واضح رہے کہ مروّجہ انشورنس چونکہ سود اور غرر (غیر یقینی صورتحال) پر مشتمل ہونے کی وجہ سے ناجائز اور حرام ہے، اس لئے اس کی پالیسی لینا جائز نہیں ہے، لہذا پوچھی گئی صورت میں اس عورت کیلئے صرف اصل رقم حلال ہے، اس کے اوپر ملنے والی اضافی رقم کا استعمال شرعاً جائز نہیں ہے، اضافی رقم کو بلا نیت ثواب صدقہ کرنا لازم ہوگا۔