سوال: مجھے پروسٹیٹ (prostate) کا عارضہ لاحق ہے، اس لیے پیشاب کے بعد عضو تناسل کو خشک کر کے میں اس پر ٹشو لپیٹ لیتا ہوں کیوں کہ کبھی کبھی مجھے پشاب کے بعد قطرے آتے ہیں۔ بعض اوقات جب میں پیشاب کرنے جاتا ہوں تو مجھے ٹشو پیپر پر پیشاب کے قطروں کے خشک نشانات نظر آتے ہیں، اس دوران میں نے کچھ نمازیں بھی پڑھی ہوتی ہیں، اس صورت میں شرعی حکم بیان فرمائیں۔

جواب: 1) پوچھی گئی صورت میں اگر آپ کو اس قدر قطرے آتے ہیں کہ ایک نماز کے پورے وقت میں آپ کو مسلسل قطروں کے نکلنے کی وجہ سے اطمینان سے پاکی حاصل کرکے باوضو ہوکر فرض نماز ادا کرنے جتنا موقع نہ ملتا ہو تو اس صورت میں آپ شرعی معذور کے حکم میں ہوں گے، شرعی معذور ہونے کی صورت میں کسی بھی فرض نماز کو ادا کرنے کے لیے اس کا وقت شروع ہونے کے بعد وضو کرکے نماز پڑھ لیں، اس دوران قطروں کے آنے سے آپ کا وضو نہیں ٹوٹے گا اور نہ ہی آپ کو کپڑے بدلنے کی ضرورت ہے، البتہ جیسے ہی فرض نماز کا وقت ختم ہوجائے گا تو آپ کا وضو بھی ٹوٹ جائے گا اور اگلی نماز کے لیے نیا وضو کرنا ہوگا۔
2) اور اگر آپ کی بیماری اس حد تک نہیں ہے کہ آپ پر شرعی معذور کا حکم لگ سکے، بلکہ آپ کو کچھ دیر کے لیے قطرے آتے ہیں اور پاکی حاصل کرکے فرض نماز پڑھنے کا موقع مل جاتا ہے تو اس صورت میں فرض نماز پڑھنے کے بعد اگر آپ کو ٹشو (Tissue) یا کپڑے پر پیشاب کے قطروں کے خشک نشان نظر آئیں تو پہلے یہ دیکھیں کہ اس کا پھیلاو کتنا ہے، اگر پیشاب کے قطرے ایک درہم (5.94 مربع سینٹی میٹر) کی مقدار سے زیادہ لگے ہیں تو اس صورت میں پیشاب کے ان قطروں کے ساتھ پڑھی گئی نماز درست نہیں ہوئی، کپڑے پاک کرکے ان نمازوں کا اعادہ کرنا ضروری ہے، لیکن اگر پیشاب کے قطرے ایک درہم (5.94 مربع سینٹی میٹر) کی مقدار یا اس سے کم ہوں تو اس صورت میں پڑھی گئی نماز کراہت کے ساتھ ادا ہوگئی ہے، اس کے اعادہ کی ضرورت نہیں ہے، یہ تفصیل اس صورت میں ہے جب آپ نے وضو قطرے آنے کے بعد کیا ہو، لیکن اگر نماز کے لیے وضو کرنے کے بعد قطرے آئے ہوں تو اس صورت میں وضو ٹوٹنے کی وجہ سے نماز واجب الاعادہ ہوگی۔