سوال: ایک صاحب کو کہتے ہوئے سنا کہ ہر اچھا عمل، جائز عمل، مباح عمل جیسے: کھانا، پینا، ناخن کاٹنا، کپڑے استری کرنا، ہاتھ پاؤں پر کریم لگانا اور ان جیسے مختلف کام کرتے ہوئے اگر ہم اپنے آپ کو قبلہ رو کرلیں تو یہ سارے عمل نیکی میں شمار ہوجاتے ہیں، ہر جائز اور مباح عمل کو کھڑے یا بیٹھے ہوئے اپنا رخ قبلہ کی طرف کرلینا چاہیے۔ براہ کرم آپ وضاحت فرمادیں کہ ایسا کرنا جائز، مباح، نیکی اور بدعت میں سے کیا ہے؟

جواب: واضح رہے کہ اعمال کا دار و مدار نیت پر ہے، اگر مباح امور میں نیت درست کرلی جائے تو اس پر بھی ثواب ملتا ہے، جہاں تک قبلہ رُخ ہونے کا تعلق ہے تو بعض امور ایسے ہیں جن میں قبلہ رُخ ہونے کی تاکید کی گئی ہے، جیسے نماز کے وقت، قربانی کرتے وقت ذابح اور ذبیحہ دونوں کا قبلہ رخ ہونا، میت کو دفناتے وقت قبلہ رخ کردینا، وغیرہ۔ ان امور ميں تو قبلہ رخ ہونا فرض یا سنت ہے، لیکن ہر مباح کام میں قبلہ کی طرف منہ کرنے کا حکم نہیں دیا گیا، بلکہ بعض مباح اعمال جیسے تھوکتے اور بول و براز کے وقت قبلہ کی طرف منہ کرنے کو منع بھی کیا گیا ہے، اسی طرح ہمبستری کرتے وقت بھی قبلہ رُخ ہونا مکروہ ہے۔