سوال: آج حرم مکہ میں 13 حاجی احرام کی حالت میں انتقال کرگئے ہیں، ان کے چہرے نہیں ڈھانپے گئے ہیں، کیونکہ حدیث میں آتا ہے کہ ان کے چہرے نہ ڈھانپو یہ قیامت کے دن تلبیہ پڑھتے ہوئے اٹھیں گے۔
قال رسول الله صلى الله عليه وسلم :لمن مات وهو بإحرامه “اغسلوه بماءٍ وسدر وكفنوه في ثوبين، ولا تحنطوه، ولا تخمروا رأسه، فإنه يبعث يوم القيامة ملبياً”. اللهم ارزقنا حسن الخاتمة ⁦
مفتی صاحب ! کیا یہ حدیث صحیح ہے؟

جواب: جی ہاں ! یہ حدیث ثابت ہے، ذیل میں حدیث اور اس کا ترجمہ نقل کیا جاتا ہے:
صحيح البخاري:
١٢٢۰ حَدَّثَنَا أَبُو النُّعْمَانِ ، أَخْبَرَنَا أَبُو عَوَانَةَ ، عَنْ أَبِي بِشْرٍ ، عَنْ سَعِيدِ بْنِ جُبَيْرٍ ، عَنِ ابْنِ عَبَّاسٍ رَضِيَ اللَّهُ عَنْهُمْ : أَنَّ رَجُلًا وَقَصَهُ بَعِيرُهُ وَنَحْنُ مَعَ النَّبِيِّ صَلَّى اللَّهُ عَلَيْهِ وَسَلَّمَ ، وَهُوَ مُحْرِمٌ ، فَقَالَ النَّبِيُّ صَلَّى اللَّهُ عَلَيْهِ وَسَلَّمَ : اغْسِلُوهُ بِمَاءٍ وَسِدْرٍ ، وَكَفِّنُوهُ فِي ثَوْبَيْنِ ، وَلاَ تُمِسُّوهُ طِيبًا ، وَلاَ تُخَمِّرُوا رَأْسَهُ ، فَإِنَّ اللَّهَ يَبْعَثُهُ يَوْمَ القِيَامَةِ مُلَبِّيًا".
( صحيح البخاري : كتاب الجنائز، باب كيف يكفن المحرم؟ حديث رقم: ١٢٢۰ )
ترجمہ:
حضرت عبداللہ بن عباس رضی اللہ عنہ فرماتے ہیں ایک شخص
اونٹنی سے گر پڑا اور اس اونٹنی نے اس کی گردن توڑ ڈالی، ہم نبی کریم صلی اللہ علیہ وسلم کے ساتھ تھے، نبی کریم صلی اللہ علیہ وسلم نے فرمایا کہ اس کو پانی اور بیری کے پتوں سے غسل دو اوراحرام ہی کے دو کپڑوں کا کفن دو، لیکن خوشبو نہ لگانا اور نہ اس کا سر چھپانا ؛ کیونکہ اللہ تعالیٰ قیامت میں اسے لبیک کہتے ہوئے اٹھائے گا۔
نیز ایک اور حدیث میں یہ الفاظ ہیں "إذَا مَاتَ ابْنُ آدَمَ انْقَطَعَ عَمَلُهُ إلَّا مِنْ ثَلَاثٍ" کہ جب ابن آدم کا انتقال ہوجائے تو اس کے عمل کا سلسلہ بند ہوجاتاہے، چونکہ احرام بھی ایک عمل ہے، لہذا اس کے منقطع ہونے سے احرام کے احکام بھی منقطع ہوجائیں گے، نیز فقہاء کرام کے نزدیک یہ حدیث صرف اسی ایک صحابی کے واقعے کیساتھ خاص تھی، عام حکم نہیں تھا۔
لہذا حنفیہ کے نزدیک ایسے مرحوم حاجی کے ساتھ عام میت جیسا معاملہ کیا جائے گا، چنانچہ اس کے سر کو ڈھانپنا، خوشبو وغیرہ لگانا جائز ہوگا۔