سوال: مفتی صاحب ! کیا یکم محرم الحرام حضرت عمرؓ کی تاریخ وفات ہے؟ براہ مہربانی اس کی مکمل تحقیق فرمادیں۔

جواب: واضح رہے کہ کسی کی تاریخ ولادت یا وفات میں اختلاف کوئی نئی بات نہیں ہے اور نہ ہی اس اختلاف سے اس کی شخصیت پر اثر پڑتا ہے۔حضرت عمر ؓکی تاریخِ شہادت میں مختلف اقوال ملتے ہیں، لیکن جمہور مؤرخین اس پر متفق ہیں کہ آپؓ کی شہادت ماہ ذی الحجہ میں ہوئی ہے، تلاش کے باوجود یکم محرم کو شہادت کی مضبوط روایت نہیں ملی، البتہ یکم محرم الحرام کو تدفین ہوئی ہے۔ چنانچہ مشہور مفسر و مؤرخ امام ابن جریر الطبریؒ نے اپنی مشہور تصنیف تاریخ ِطبری میں اس بارے میں مختلف اقوال نقل فرمائے ہیں:
پہلا قول: یہ ہے کہ بدھ کی رات جبکہ ذی الحج میں تین دن باقی تھے کہ آپ فوت ہوگئے اور آپ کو بدھ کی صبح دفن کیا گیا۔ابوجعفر نے کہا کہ یہ بھی کہا گیا ہے کہ آپ کی وفات یکم محرم الحرام سن 24 ھجری میں ہوئی ہے۔
دوسراقول: ابوبکر بن اسماعیل اپنے باپ سے روایت کرتے ہیں کہ بدھ کے دن سن 23 ھجری ذی الحج کی چار راتیں باقی تھیں کہ سیدنا عمرؓ کو زخم لگا اوراتوار کے دن سن 24 ھجری محرم کی پہلی تاریخ کو دفن کیے گئے۔
تیسرا قول:عثمان اخنسی کہتے ہیں کہ یہ وھم ہے (یعنی جو پہلے بیان ہوا)، بلکہ ذی الحج کی چار راتیں باقی تھیں کہ سیدنا عمرؓ کی وفات ہوگئی تھی یعنی 26 ذی الحجہ کو۔
چوتھا قول: حضرت عمر بروز بدھ 26 ذی الحجہ کو سن 23 ھجری کو شہید کیے گئے۔
پانچواں قول: ابن شھاب زہری کہتے ہیں کہ 23 ذی الحجہ کو زخمی کیے گئے اور وفات تین دن بعد یعنی 26 کو ہوئی۔
چھٹا قول:آپ شہید کیے گئے، جبکہ ذی الحجہ کی تین راتیں باقی تھیں۔(تاریخ الطبری:193/4۔194)
مشہور مؤرخ امام ابن اثیرؒ اپنی مشہور زمانہ کتاب "اسد الغابہ فی معرفتہ الصحابہ" میں سیدنا فاروق اعظمؓ کا یومِ شہادت یوں بیان کرتے ہیں: پہلا قول ابوبکر بن اسماعیل والا جو پہلے ذکر ہو چکا ہے۔ دوسرا قول عثمان اخنسی والا وہ بھی پہلے گزر چکا ہے۔ تیسرا قول ابن قتیبہ کی وہی روایت ہے، جس کو عثمان اخنسی نے وھم قرار دیا ہے۔(اسد الغابة: (156/4)
مشہور و قدیم سیرت نگار محمد بن سعد الزھریؒ نے اپنی شہرۂ آفاق کتاب "طبقات الکبیر" المعروف طبقات ابن سعد میں دو روایتیں نقل فرمائی ہیں: ایک "ابوبکر بن اسماعیل" اور دوسری "عثمان الاخنسی" والی جو "اسد الغابہ" کے حوالہ سے اوپر گزر چکی ہے۔
مؤرخ ابو الحسن المسعودی (متوفی٣٤٦ھ) لکھتے ہیں: حضرت عمر ؓکو ان کی خلافت کے دوران ہی حضرت مغیرہؓ بن شعبہ کے غلام ابولؤلؤ نے قتل کر دیا تھا، اس وقت سن ہجری کا 23 واں سال تھااور بدھ کا دن تھا جب کہ ماہ ذی الحجہ کے اختتام میں چار روز باقی تھے۔ (مروج الذہب: ج:2، ص:240 ،ط:المکتبة العصریہ )
مشہور مؤرخ اور مفسر ابو الفداء ابن کثیر (متوفی٧٧٤ھ) مختلف اقوال لکھتے ہیں: پہلا وہی ابوبکر بن اسماعیل والا ، دوسرا وہی عثمان الاخنسی والا،تیسرا  ابو معشر کا جو طبری کے حوالہ سے پہلے بیان ہوا،چوتھا ھشام بن محمد کا یہ بھی طبری کے حوالہ سے گزر چکا، پانچواں زہری کا یہ بھی طبری کے حوالہ سے ذکر ہو چکا ہے۔ ان تمام اقوال کو نقل کرنے کے بعد حافظ ابن کثیر اپنی رائے یوں بیان کرتے ہیں کہ  پہلا قول زیادہ مشہور ہے کہ زخم 26 کو لگا اور دفن یکم محرم کو ہوئے۔
مشہور مؤرخ علامہ ابن خلدون لکھتے ہیں: زخمی ہونے کے بعد برابر ذکر اللہ کرتے رہے، یہاں تک کہ شب چہار شنبہ 27 ذی الحجہ 23 ہجری کو اپنی خلافت کے 10 برس 6 مہینے بعد جان بحق تسلیم ہوئے۔
علامہ ابن عساکر نے تاریخ دمشق میں بہت سے اقوال نقل کیے ہیں ان میں ایک قول یکم محرم کا بھی نقل کیا ہے، لیکن وہ ضعیف ہے: حضرت عمر ؓ ذی الحجہ کے چند دن باقی تھے کہ زخمی کیے گئے اور تین دن تک زندہ رہے اور ہفتے کے دن یکم محرم کو انتقال فرماگئے، لیکن علامہ ابن عساکر نے جو تفصیل نقل کی ہے، اس سے اس قول کی یہ تاویل ہوسکتی ہے کہ 26 ذی الحجہ کو زخمی کیے گئے اور تین دن زندہ رہے اور ہفتہ کے دن محرم کی چاند رات کو وفات پاگئے اور اس کی تائید علامہ سیوطیؒ کی بات سے بھی ہوتی ہے اور خود علامہ ابن عساکرؒ نے امام المؤرخین امام واقدی سے بھی یہی نقل کیا ہے۔
علامہ جلال الدین سیوطیؒ تاریخ الخلفاء میں لکھتے ہیں: حضرت عمر بدھ کے دن26ذی الحجہ 23ھجری کو شہید ہوئےاور ہفتہ کے دن محرم کی چاند رات کو دفن کئے گئے۔
شاہ عبدالعزیر دہلوی رحمہ اللہ فرماتے ہیں: "رہا تاریخ کا معاملہ تو حضرت عمر فاروق رضی اللہ عنہ کی شہادت بلا اختلاف 28 ذی الحجہ کو واقع ہوئی اور یکم محرم کو آپ مدفون ہوئے۔ (تحفہ اثنا عشریہ اردو: ص:،ط)

علامہ شبلی نعمانیؒ نے شھادت کا عنوان "حضرت عمر رضی اللہ عنہ کی شہادت 26 ذوالحجہ "قائم کرکے شہادت کا مکمل واقعہ ذکر کرنے کے بعد لکھتے ہیں کہ حضرت عمر نے تین دن بعد انتقال کیا اور محرم کی پہلی تاریخ ہفتہ کے دن مدفون ہوئے۔ (الفاروق:ص: 148۔152، ط: المصباح، کراچی)
مفتی زین العابدین میرٹھی لکھتے ہیں: حضرت عمر کی وفات زخمی ہونے کے تیسرے دن 27 ذی الحجہ ۲۳ ہجری کو بدھ کی رات میں واقع ہوئی۔ (تاریخ ملت: ج:1،ص:291،ط:ادارہ اسلامیات، کراچی) 
خلاصہ کلام:
جمہور کے نزدیک حضرت عمر فاروق چھبیس ذی الحجہ کو زخمی ہوئے۔ بعض کے نزدیک چھبیس سے پہلے زخمی ہوئے اور بعض کے نزدیک ستائیس ذی الحج کو زخمی کیے گئے۔
اس پوری تفصیل سے یہ بات قرین قیاس معلوم ہوتی ہے جو مولانا یوسف لدھیانوی شہید نے " آپ کے مسائل اور ان کا حل" میں لکھی ہے کہ "26 ذی الحجہ 23 ہجری بروز چہار شنبہ مطابق 31 اکتوبر 644 ء کو نماز فجر میں ابو لؤلؤمجوسی کے خنجر سے زخمی ہوئے، تین راتیں زخمی حالت پر زندہ رہے، 29 ذی الحجہ 3 نومبر کو وصال ہوا، یکم محرم 24 ہجری کو روضہ اطہر میں آسودہ خاک ہوئے، حضرت صہیبؓ نے نماز جنازہ پڑھائی۔(ج:1 ص: 151،ط:مکتبہ لدھیانوی )
حقیقت یہ ہے کہ ذی الحجہ یا محرم کی تاریخوں سے حضرت فاروق اعظم کی عظمت پر کوئی فرق نہیں پڑتا، حضرت عمر، عمر رضی اللہ عنہ تھے اور فاروق اعظم تھے، اور مسلمانوں کی عزت و آبرو اور تاریخ اسلام کے ماتھے کا جھومر ہیں۔ (رضی اللہ عنہ و ارضاہ )