سوال:
اللھم اعنا علی ذکرک و شکرک و حسن عبادتک اس حدیث کی تصدیق فرمادیں، اس لیے کہ اس حدیث میں جو دعا ارشاد فرمائی ہے، اس کو تو آج تک ان الفاظ "اللهم أعني على ذكرك وشكرك وحسن عبادتك" میں سنتے آرہے ہیں۔
جواب: واضح رہے کہ لفظ"أَعِنَّا" عربی گرامر میں جمع متکلم کا صیغہ ہے، لہذا جب دعا میں "اللھم أعنا " پڑھا جائے،تو اس کا ترجمہ ہوگا:"اے اللہ !ہماری مدد فرما"اورلفظ "أَعِنّي" عربى گرامر میں واحد متکلم کا صیغہ ہے، لہذا جب دعا میں "اللھم أَعِنّي" پڑھا جائے تو اس کا ترجمہ ہوگا: "اے اللہ !میری مدد فرما"۔ جب زیادہ لوگوں کے لیے یہ دعا کرنى ہو تو "اللھم أعنا" کے الفاظ سے یہ دعا مانگى جائے اور جب صرف اپنے لیے یہ دعا مانگنى ہو تو "اللھم أَعِنّي" کے الفاظ سے یہ دعا مانگے، کیونکہ آنحضرت ﷺ نے ان دونوں الفاظ کے ساتھ امت کو یہ دعا سکھائى ہے۔ (1)
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
(1) مسند أحمد : (36/ 443، رقم الحدیث (22126)، ط :مؤسسة الرسالة)
عن معاذ قال: لقيني رسول الله صلى الله عليه وسلم فقال: " يا معاذ إني لأحبك ". فقلت: يا رسول الله، وأنا والله أحبك. قال: " فإني أوصيك بكلمات تقولهن في كل صلاة: اللهم أعني على ذكرك وشكرك وحسن عبادتك ".
مسند أحمد : (13/ 360، رقم الحدیث (7982)، ط :مؤسسة الرسالة)
عن أبي هريرة، عن النبي صلى الله عليه وسلم قال: " أتحبون أن تجتهدوا في الدعاء؟ قولوا: اللهم أعنا على شكرك، وذكرك، وحسن عبادتك ".
واللہ تعالٰی اعلم بالصواب
دارالافتاء الاخلاص،کراچی