سوال: مفتی صاحب! سنا ہے کہ پہلے قرآن شریف اس طرح کتابی شکل میں نہیں تھا، بلکہ پتوں، لکڑیوں اور پتھروں وغیرہ پر لکھا ہوا تھا اور وہ بھی مکمل قرآن مجید کسی کے پاس جمع نہیں تھا، آپ صلی اللہ علیہ وسلم کی وفات کے بعد قرآن مجید کو کتابی صورت میں جمع کیا گیا ہے۔ مفتی صاحب اگر یہ بات درست ہے تو آپ اس بات کی وضاحت فرمادیں کہ قرآن کریم کو آپ صلی اللہ علیہ وسلم کی وفات کے بعد کس صدی میں جمع کیا گیا ہے اور اس کے جمع کرنے کی ضرورت کیوں پیش آئی؟

جواب: واضح رہے کہ آپ صلی اللہ علیہ وسلم نے اپنے دور میں باقاعدہ کتابت وحی کا اہتمام فرمایا تھا اور اس کے لیے کچھ صحابہ کرام رضوان اللہ علیہم اجمعین مقرر فرمائے تھے، لہذا جب بھی وحی نازل ہوتی تو آپ صلی اللہ علیہ وسلم کاتبینِ وحی میں سے کسی کو بلا کر نازل شدہ آیات تحریر کرواتے اور لکھنے کے بعد اس کی املاء چیک کرتے کہ کہیں لکھنے میں کوئی غلطی تو نہیں ہوگئی ہے، اس ترتیب کے مطابق آپ صلی اللہ علیہ وسلم نے پورا قرآن مجید تحریر کروایا اور آپ صلی اللہ علیہ وسلم کے تحریر کروائے ہوئے نسخہ سے دیگر صحابہ کرام نے بھی اپنے لیے کاپیاں تیار کیں، البتہ دورِ نبوی میں قرآن مجید یکجا کتابی شکل میں موجود نہیں تھا، بلکہ چمڑے، پتھر اور ہڈی وغیرہ پر مختلف سورتیں تحریر تھیں۔
آپ صلی اللہ علیہ وسلم کے اس دنیا سے تشریف لے جانے کے ایک سال بعد حضرت ابوبکر صدیق رضی اللہ عنہ کے دور میں مسیلمہ کذاب کے خلاف ایک جنگ لڑی گئی، اس جنگ میں مسلمانوں کی ایک بڑی تعداد نے جامِ شہادت نوش کیا، ان شہداء میں حفاظ صحابہ کی بھی ایک بڑی تعداد تھی، اس جنگ کے بعد حضرت عمر فاروق رضی اللہ عنہ کے دل میں یہ خدشہ پیدا ہوا کہ اگر اسی طرح حفاظ صحابہ شہید ہوتے گئے تو کہیں قرآن مجید ضائع نہ ہو جائے، لہذا آپ نے حضرت ابو بکر صدیق رضی اللہ عنہ کو اس کے لیے تیار کیا کہ آپ باقاعدہ سرکاری سطح پر قرآن مجید کی جمع اور کتابی حفاظت کا اہتمام فرمائیں، اس طرح دور صدیقی میں حضرت ابوبکر کے حکم پر حضرت زید بن ثابت رضی اللہ عنہ نے یہ عظیم خدمت انجام دی اور قرآن مجید کے منتشر حصوں کو جمع کرکے ایک مکمل نسخے کی شکل میں جمع کردیا، قرآن مجید کا یہ نسخہ حضرت ابوبکر صدیق رضی اللہ عنہ کے پاس تھا، آپ کی وفات کے بعد یہ حضرت عمر فاروق رضی اللہ عنہ کے پاس رہا، اور ان کی شہادت کے بعد یہ نسخہ ام المومنین حضرت حفصہ رضی اللہ عنہا کے پاس محفوظ رہا۔
دور عثمانی میں جب اسلام عرب سے نکل کر عجم (غیر عرب) میں پہنچا تو قلت علم کی وجہ سے وہ قراءتوں کے اختلاف کو نہ سمجھ پاتے اور مختلف صحابہ کرام کے عجمی شاگر ایک دوسرے کی قرائت کو غلط کہتے، آرمینا اور آذربائجان کے جہاد میں حضرت حذیفہ بن یمان رضی اللہ عنہ نے خود اس کا مشاہدہ کیا، لہذا جہاد سے واپسی پر انہوں نے امیر المومنین حضرت عثمان غنی رضی اللہ عنہ کو مسئلہ کی نزاکت کے بارے میں بتایا اور انہیں اس مسئلہ کا مستقبل حل تلاش کرنے کا مشورہ دیا، حضرت عثمان غنی رضی اللہ عنہ نے کبار صحابہ کرام سے مشورہ کے بعد حضرت زید بن ثابت کی سربراہی میں ایک کمیٹی بنائی اور حضرت حفصہ رضی اللہ عنہا سے دور صدیقی میں جمع شدہ نسخہ منگوا کر اس پر دوبارہ کام کرنے کی ذمہ داری دی، ان حضرات نے قرآن مجید کے اس نسخے کو از سرنو مرتب کیا اور رسم الخط پر محنت کرکے اس میں متواتر قراءتوں کو سمو دیا، جب یہ مصحف تیار ہو گیا تو اس کے سات نسخے تیار کروائے گئے، اور بصرہ، کوفہ، شام، بحرین، یمن، مکہ اور مدینہ میں ایک ایک نسخہ محفوظ کردیا گیا، اس طرح صحابہ کرام رضوان اللہ علیہم اجمعین کے اجماع سے تیار شدہ ایک اتفاقی نسخہ پوری دنیا میں عام ہوگیا۔
(مزید تفصیل کے لیے حضرت شیخ الاسلام مولانا مفتی محمد تقی عثمانی صاحب مدظلہ العالی کی کتاب "علوم القرآن" کے باب پنجم کا مطالعہ کیجئے)