سوال: مفتی صاحب! پہلے زمانہ میں تو کوئی تجوید وغیرہ نہیں تھی، جو جس طرح قرآن پاک پڑھ سکتا تھا وہ اسی طرح قرآن پاک پڑھتا تھا، لیکن اب مدرسوں میں تجوید کے ساتھ پڑھاتے ہیں۔ معلوم یہ کرنا ہے کہ تجوید کا مطلب کیا ہے اور کیا تجوید سے قرآن پاک پڑھنا ضروری ہے؟

جواب: لفظِ تجوید "جودۃ" سے ماخوذ ہے، جوّد يجوِّد تجويدًا سے باب تفعيل كا مصدر ہے، جس کا لغوی معنی ہے: تحسین و عمدگی، اور اصطلاحی معنی یہ ہے کہ قرآن شریف کو ایسے پڑھنا جیسے وہ حضور ﷺ پر نازل ہوا اور جس طرح آپ ﷺ نے صحابہ کرامؓ کو پڑھ کر سنایا اور جس انداز میں صحابہ کرامؓ کے واسطے سے نسل در نسل تواتر و تسلسل کے ساتھ پوری دنیا میں پڑھا جارہا ہے۔ اسی طریقے اور انداز سے ہی پڑھنا ضروری ہے۔
جب یہ بات واضح ہوگئی کہ تجوید تلاوت اور قراءت کی عمدگی اور تحسین کے ساتھ رسول اللہ ﷺ کے طریقے اور انداز کا نام ہے تو اس سوال کا جواب بھی واضح ہوگیا کہ " پہلے زمانہ میں تو کوئی تجوید وغیرہ نہیں تھی، جو جس طرح قرآن پاک پڑھ سکتا تھا وہ اسی طرح قرآن پاک پڑھتا تھا۔۔"، اس لیے کہ انداز اور طریقہ ابتدا ہی سے چل رہا ہے، جو چیز بعد میں ایجاد ہوئی وہ اسی تحسین اور عمدگی کی اصطلاحات ہیں، تاکہ تمام لوگ (بطورِ خاص عجمی لوگ) ان اصولوں کو سیکھ کر اس کے مطابق قراءت کرسکیں۔