سوال: مولانا صاحب ! اسلام ایک مشفقانہ مذہب ہے تو کیا دشمنوں سے مقابلے کے لئے جدید طرز کے اسلحہ تیار کرنے کی اسلام اجازت دیتا ہے؟ اور یہ اجازت دینا اسلام کے مشفقانہ اخلاق کے خلاف نہیں ہے؟

جواب: واضح رہے کہ قرآن و احادیث میں دشمنوں سے مقابلے کے لیے تیر اندازی، گهوڑ سواری وغیرہ سیکهنے کی ترغیب دی گئی ہے، اور واعدوالهم مااستطعتم من قوة سے اگرچہ تیر اندازی مراد ہے، مگر باعتبار عموم الفاظ اس سے مراد ہر قسم کا سامان حرب ہے اور یہ مطلب نہیں کہ قوت صرف تیر اندازی میں منحصر ہے، بلکہ تلوار، نیزہ، سپر، زرہ، خود، قلعے، سامانِ رسد اور سامانِ حرب سب قوت میں داخل ہیں، اس لیے کہ مقصود اصلی تو آیت کا یہ ہے کہ وہ سازوسامان اور آلات حرب مہیا کرو، جس کے ذریعے تم دشمن کی مدافعت کرسکو اور اس پر غالب آسکو۔
عہد نبوی میں گھوڑوں کا باندھنا اہم سامان حرب تھا، اس لیے اس کی اہمیت اور شرافت کی بنا پر اس کو علیحدہ بیان فرمایا، کتب احادیث اور تفاسیر میں تیر اندازی اور گھوڑوں کی فضیلت میں بہت سی حدیثیں مذکور ہیں اور سب سے مقصود سامان جنگ کی تیاری کا حکم دینا ہے۔
بہر حال اس آیت سے مقصود مسلمانوں کو یہ حکم دینا ہے کہ تم دشمنوں کے مقابلہ کے لیے سامان جنگ تیار کرو، جس قدرطاقت اور قوت تم فراہم کرسکتے ہو، اس میں کسر نہ چھوڑو اور ظاہر ہے کہ ہر زمانہ میں سامان جنگ بدلتا رہا ہے، پہلے زمانے میں تیر وتلوار تھے اور اس زمانے میں توپ اور بندوق ہیں، یہ سب سامان جہاد ہے اور اسی طرح آئندہ جو اسلحہ اور آلات حرب وضرب تیار ہوں گے ان شاء اللہ وہ سب اس آیت کے عموم اور مفہوم میں داخل ہوں گے اور عین منشاء قرانی ہوں گے، لہذا اس آیت کی رو سے مسلمان حکومتوں پر جدید اسلحہ کی تیاری اور ان کے کارخانوں کا قائم کرنا فرض ہوگا۔
اس لیے کہ اس آیت میں قیامت تک کے لیے ہر مکان وزمان کے مناسب قوت و طاقت کی فراہمی کا حکم دیا گیا ہے، جس طرح کافروں نے تباہ کن ہتھیار تیار کیے ہیں، ہم پر بھی اسی قسم کے تباہ کن ہتھیاروں کا تیار کرنا فرض ہوگا، تاکہ کفر اور شرک کا مقابلہ کرسکیں اور دشمنوں سے مقابلے کے لیے خطرناک قسم کے ہتھیار تیار کرنا اسلام کی شفقت اور رحمت کے خلاف نہیں ہے۔