سوال: مفتی صاحب! استنجاء اور قضائے حاجت کرنے کے آداب بیان فرمادیں۔

جواب: استنجاء اور قضائے حاجت کے جو آداب بیان کیے گئے ہیں، ان کا خلاصہ یہ ہے:
(1)اتنی دور چلا جائے کہ اس کو کوئی دیکھ نہ سکے، اس سے نکلنے والی آواز کو کوئی سن نہ سکے، نہ اس کے فُضلات کی بدبو دوسرے شخص کو پہنچے۔
(2) اگر بیت الخلاء میسر نہ ہو تو لوگوں کی نظروں سے اوجھل، باپردہ،نرم اور نشیب جگہ کا انتخاب کرے۔
(3) بیت الخلاء میں داخل ہوتے وقت اور نکلنے کے بعد مسنون دعاؤں کا اہتمام کرے۔
(4) بیت الخلاء میں داخل ہوتے وقت بایاں پاؤں اور نکلتے وقت دایاں پاؤں پہلے رکھے۔
(5) قضائے حاجت اور استنجاء کے وقت سر کو ڈھانپ لے۔
(6) بائیں پاؤں پر ذرا زور دے کر بیٹھنا کہ یہ قضائے حاجت میں سہولت کا باعث ہے۔
(7) بلاضرورت گفتگو سے گریز کرنا۔
(8) استنجاء کے لیے بایاں ہاتھ استعمال کرنا، دائیں ہاتھ سے شرم گاہ کو نہ چھونا۔
(9) قبلہ کی طرف منہ کرنے اور پیٹھ کرنے سے اجتناب کرنا۔
(10) ٹھہرا ہوا پانی جو تھوڑا ہو اس میں پیشاب سے اجتناب کرنا۔
(11) غسل کی جگہ پیشاب نہ کرنا، خاص طور پر اس جگہ جہاں پانی جمع ہوتا ہو۔
(12) بیٹھ کر پیشاب کرنا۔
(13) استنجاء کرنے سے پہلے استبراء (اچھی طرح فراغت کا یقین) کرنا۔
(14) کسی قابلِ احترام، قیمتی یا تکلیف دہ چیز سے یا ایسی چیز جو مزید آلودگی اور گندگی کا سبب بنے، اس سے استنجاء کرنے سے گریز کرنا۔
(ماخوذ بتغییر یسیر از تفہیم الفقہ : 25/2 تا 29، مکتبة النور)