سوال:
السلام علیکم، عصر کی نماز باجماعت میں اگر صرف آخری رکعت ملے، تو باقی کی 3 رکعات کیسے پڑھنی ہونگی ؟ اسی طرح اگر مغرب کی آخری رکعت ملے، تو باقی 2 رکعت کیسے پڑھنا چاہیے ؟ رہنمائی فرما دیں. جزاک اللہ
جواب: اس سلسلے میں ایک اصول یاد رکھنا چاہیے کہ جو رکعتیں آپ کو جماعت کے ساتھ ملی ہیں، وہی رکعتیں تصور کی جائیں گی کہ آپ کو ملی ہیں اور جو پہلی رکعتیں فوت ہوئی ہیں، وہ آپ سے فوت ہوئی ہیں، اس کو آپ نے بالترتیب دھرانا ہے، اور اس میں سورة فاتحہ اور سورة بھی پڑھنا ہے، چنانچہ اگر کسی کو مغرب کی ایک رکعت ملی ہے، تو یہ تصور کیا جائے گا کہ اس کو تیسری رکعت ملی ہے اور اس کے ذمہ پہلی دو رکعات باقی ہیں ،لہذا ان دونوں رکعتوں میں سورة فاتحہ اور سورت پڑھی جائے گی۔ اور جس کو عصر کی ایک رکعت ملی ہے تو یہ تصور کیا جائے گا کہ اس کو چوتھی رکعت ملی ہے، اور اس کے ذمہ شروع کی تین رکعتیں باقی ہیں، لہذا شروع کی دو میں سورۃ فاتحہ اور سورت، جبکہ آخری رکعت میں صرف سورۃ فاتحہ پڑھی جائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الدر المختار: (596/1، ط: دار الفکر)
(والمسبوق من سبقه الإمام بها أو ببعضها وهو منفرد) حتى يثني ويتعوذ ويقرأ، وإن قرأ مع الإمام لعدم الاعتداد بها لكراهتها مفتاح السعادة (فيما يقضيه) أي بعد متابعته لإمامه، فلو قبلها فالأظهر الفساد، ويقضي أول صلاته في حق قراءة، وآخرها في حق تشهد۔
واللہ تعالی اعلم بالصواب
دارالافتاء الاخلاص،کراچی