سوال: السلام علیکم، حضرت ! مسئلہ یہ ہے کہ ایک شخص نے نکاح کرتے ہوئے جان بوجھ کر نام غلط لکھوایا ہے، اور وہ دوسری شادی کررہا تھا، اِس لیے اصلی نام چھپایا تھا، تو یہ نکاح ہو جائے گا؟ اور اس نے اپنی پہلی بِیوِی کو بتایا بھی نہیں، اِجازَت نہیں لی۔ کیا پہلی بیوی کی اجازت کے بغیر شادی ہوجاتی یے؟
جزاک اللہ

جواب: اگر دولہا مجلس نکاح میں موجود ہو اور اس کی طرف اشارہ کرکے اس سے نکاح کا ایجاب و قبول کرایا جائے، یا گواہان کو پتہ ہو کہ نکاح کرنے والا یہی شخص ہے، تو یہ نکاح درست ہے، اگرچہ دولہا کا نام غلط لکھا گیا ہو، لیکن ایسا کرنا دھوکہ دہی بھی ہے، بعد میں قانونی مشکلات کا باعث بھی ہے۔
بہر کیف! واضح رہے کہ اسلام میں ایک مرد کو چار بیویاں تک رکھنے کی اجازت ہے اور یہ اجازت مطلق ہے، لہذا پہلی بیوی یا دوسری بیوی کی اجازت ورضامندی پر یہ اجازت موقوف نہیں ہے، تاہم مصلحت کا تقاضہ یہ ہے پہلے موجودہ بیوی کی ذہن سازی کرکے اسے بھی راضی کرلیا جائے، اس کے بعد دوسری شادی کی جائے، تاکہ جھوٹ بھی نہ بولنا پڑے اور پہلی بیوی سے چھپنا بھی نہ پڑے، ورنہ پہلی بیوی کو دوسری بیوی کا علم ہونے پر، اس کی طرف سے ناخوش گوار حالات کا سامنا کرنا پڑسکتا ہے، جو کہ بعض مرتبہ آدمی کے لیے ناقابل برداشت ہوجاتا ہے۔
نیز ایک سے زائد بیویاں رکھ کر ان کے درمیان برابری، عدل وانصاف کرنا ضروری ہے، لہذا اگر کسی ایک بیوی کی طرف جھکاؤ ہو، اور اس کی وجہ سے دوسری کے حقوق واجبہ میں کوتاہی کی جائے، تو یہ سخت گناہ ہے اور قیامت کے دن ایسا شخص اس حال میں حاضر ہوگا کہ اس کا دھڑ ایک طرف کو ڈھلکا ہوا ہوگا جیسا کہ حدیث میں آیا ہے۔