سوال:
مفتی صاحب ! زوال کے وقت سجدہ نہ کرنے کا حکم قرآن یا حدیث میں کہاں آیا ہے؟ برائے مہربانی وضاحت فرمائیں۔ جزاك الله خيراً
جواب: واضح رہے کہ احادیث میں زوال کے وقت نماز پڑھنے سے منع کیا گیا ہے، اورسجدہ بھی نماز کا ایک حصہ ہے، لہذا جب پوری نماز پڑھنا منع ہے تو سجدہ کرنا بھی بدرجہ اولی منع ہوگا، جیسا کہ صحیح مسلم میں ہے:حضرت عقبہ بن عامر جہنی رضی اللہ تعالیٰ عنہ فرماتے ہیں كہ رسول اللہﷺتین وقتوں میں نماز پڑھنے اور اپنے مردوں کو دفن کرنے سے منع فرماتے تھے: اول سورج نکلنے کے وقت یہاں تک کہ بلند ہو جائے، دوسرا دوپہر کا سایہ قائم ہونے "یعنی نصف النھار" کے وقت یہاں تک کہ سورج ڈھل جائے اور تیسرا اس وقت جب کہ سورج ڈوبنے لگے یہاں تک کہ غروب ہو جائے۔ (صحیح مسلم)
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
صحیح مسلم: (باب الأوقات التي نہی عن الصلاۃ فیہا)
عن عقبۃ بن عامر الجہني رضي اللّٰہ عنہ قال: ثلاث ساعات کان رسول اللّٰہ صلی اللّٰہ علیہ وسلم ینہانا أن نصلي فیہن أو أن نقبر فیہن موتانا: حین تطلع الشمس بازغۃ حتی ترتفع، وحین یقوم قائم الظہیرۃ حتی تمیل الشمس، وحین تضیف الشمس للغروب حتی تغرب۔
الھندیۃ: (کتاب الصلاۃ، الفصل الثالث في بیان الأوقات التي لا تجوز فیہا الصلاۃ و تکرہ فیہا)
ثلاث ساعات لا تجوز فیھا المکتوبۃ ولا صلوۃ الجنازۃ ولا سجدۃ التلاوۃاذا طلعت الشمس حتی یرتفع وعند الانتصاف الی ان تزول واحمرارھا الی ان تغیب الاعصر یومہ ذلک فانہ یجوز ادائہ عند الغروب، ھکذا فی فتاوی قاضیخان
الھدایۃ: (کتاب الصلاۃ)
ولا سجدۃ تلاوۃ؛ لأنہا في معنی الصلاۃ… والمراد بالنفي المذکور في … سجدۃ التلاوۃ الکراہۃ،
واللہ تعالٰی اعلم بالصواب
دارالافتاء الاخلاص،کراچی