سوال: امام ابو حنیفہ رحمۃ اللہ علیہ کا وضو کے پانی سے گناہوں کا دیکھ لینا، کیا یہ بات درست ہے کہ ایسا ہو سکتا ہے؟
اصل میں کچھ طبقات کشف کا انکار کرتے ہیں اور کسی صحیح حدیث کا حوالہ دیتے ہیں، مگر یہ کہتے ہیں کہ پہلے کی امتوں میں کسی امتی کے لیے ممکن تھا، مگر اِس امت کے لیے ممکن نہیں ہے۔ براہ مہربانی صحیح حدیث کے حوالے سے ان باتوں کی اصلاح فرمادیں۔

جواب: کسی انسان کے باطن کی صفائی اور تقوی کی برکت سے بعض مرتبہ اسے من جانب اللہ کچھ مخفی احوال واضح کر دیے جاتےہیں، اسے" کشف" کہتے ہیں۔
اس سلسلے میں حضرت عمر فاروق رضی اللہ عنہ کا مشہور واقعہ ہے: حضرت ابن عمر رضی اللہ عنہ سے روایت ہے آپ نے فرمایا: حضرت عمر رضی اللہ عنہ نے ایک لشکر کو روانہ فرمایا اور حضرت ساریہ رضی اللہ عنہ کو اُس لشکر کا سپہ سالار بنایا ، ایک دن حضرت عمر رضی اللہ عنہ نے خطبہ کے درمیان یہ ندا دی کہ یا ساریۃ الجبل ، اے ساریہ! پہاڑ کے دامن میں ہوجاؤ ۔ یہ آپ نے تین دفعہ فرمایا، جب لشکر کی جانب سے قاصد آیاتو حضرت عمر رضی اللہ عنہ نے اس سے وہاں کا حال دریافت کیا ؟ اُس نے کہا : اے امیر المؤمنین! ہم نے دشمن سے مقابلہ کیا تو وہ ہمیں شکست دے ہی چکے تھے کہ اچانک ہم نے ایک آواز سنی ، اے ساریہ! پہاڑ کے دامن میں ہوجاؤ ۔ پس ہم نے اپنی پیٹھ پہاڑ کی جانب کرلی تو اللہ تعالی نے دشمنوں کو شکست دے دی ۔ حضرت عمر رضی اللہ عنہ سے یہ بھی عرض کیا گیا کہ بیشک وہ آواز دینے والے آپ ہی تھے ۔(دلائل النبوة للبيهقي،حديث نمبر:۲۶۵۵)
کشف سے حاصل ہونے والا علم ظنی ہوتا ہے، اگر وہ علم شریعت کے مطابق ہو تو قابل قبول ہوتا ہے، البتہ اس پر عمل کرنا لازم نہیں ہوتا ہے، اور اگر وہ علم شریعت کے مطابق نہ ہو تو اس کا اعتبار نہیں کیا جائے گا، جیسا کہ امام ابوحنیفہ رحمہ اللہ کا وضو سے جھڑنے والے گناہوں کا کشف ہو جانا قابل قبول ہے، کیونکہ وضو سے گناہوں کے جھڑنے کا ذکر حدیث شریف میں موجود ہے۔
صحیح مسلم میں حضرت ابو ہریرہ ؓ سے روایت ہے کہ رسول اللہ ﷺ نے فرمایا: ’’جب ایک مسلم (مومن) بندہ وضو کرتا ہے اور اپنا چہرہ دھوتا ہے تو پانی (یاپانی کے آخری قطرے) کے ساتھ اس کے چہرے سے وہ سارے گناہ، جنہیں اس نے اپنی آنکھوں سے دیکھتے ہوئے کیا تھا، خارج ہو جاتے ہیں۔ اور جب وہ اپنے ہاتھ دھوتا ہے تو پانی (یا پانی کے آخری قطرے) کے ساتھ وہ سارے گناہ، جو اس کے ہاتھوں نے پکڑ کر کیے تھے، خارج ہو جاتے ہیں۔ اور جب وہ اپنے دونوں پاؤں دھوتا ہے تو پانی (یا پانی کے آخری قطرے) کے ساتھ وہ تمام گناہ، جو اس کے پیروں نے چل کر کیے تھے، خارج ہو جاتے ہیں، حتی کہ وہ گناہون سے پاک ہو کر نکلتا ہے۔(صحیح المسلم:حدیث نمبر: ۵۷۷ )
نیز کشف غیر اختیاری چیز ہے، اور یہ شریعت کا مطلوب و مقصود بھی نہیں ہے۔
یہ بھی واضح رہے کہ اس سے شریعت کا کوئی حکم ثابت نہیں ہوتا ہے، بلکہ اس کی حقیقت صرف اس قدر ہے کہ بعض مرتبہ اللہ تعالی صرف اپنے خاص بندوں کی تسلی کے لیے یا ان پر انعام کرنے کے لیے ان پر مخفی باتوں کو کھول دیتے ہیں۔