سوال: السلام علیکم، جناب ! جب کسی کے گھر میں لڑکی پیدا ہو جائے، تو شرعی عقیقہ کا طریقہ بتادیں۔ جزاک اللہ

جواب: عقیقہ کے لغوی معنیٰ کاٹنے، چیرنے اور پھاڑنے کے ہیں۔ شرعی اصطلاح میں نومولود بچہ / بچی کی جانب سے اس کی پیدائش کے ساتویں دن جو جانور ذبح کیا جاتا ہے، اُسے "عقیقہ" کہتے ہیں۔ 
بچے کی پیدائش کے ساتویں دن عقیقہ کرنا سنت (غیر موکدہ) یعنی مستحب کے حکم میں ہے، اگر ساتویں دن عقیقہ نہ کرسکے، تو چودھویں (14) دن، ورنہ اکیسویں (21) دن کرے، اس کے بعد عقیقہ کرنا مباح ہے، اگر کرلے تو ادا ہوجاتا ہے، تاہم جب بھی عقیقہ کرے، بہتر یہ ہے کہ پیدائش کے دن  کے حساب سے ساتویں دن کرے۔
اللہ کے رسول صلی اللہ علیہ وسلم نے اپنے نواسوں حضرت حسن اور حضرت حسین رضی اللہ عنہما کی طرف سے عقیقہ فرمایا تھا، اور رسول اللہ صلی اللہ علیہ وسلم نے حضرت حسن اور حضرت حسین رضی اللہ عنہما کی طرف سے دو دو مینڈھے ذبح فرمائے تھے۔
ایک حدیث کا مفہوم ہے کہ ”عقیقہ“ کی وجہ سے بچہ پر سے بلائیں ٹلتی ہیں۔
 
اگر لڑکا پیدا ہو تو دو بکرے (یا بڑے جانور میں دو حصے) اور لڑکی پیدا ہو تو ایک بکرا (یا بڑے جانور میں ایک حصہ) ذبح کرنا مستحب ہے۔
عقیقہ کے گوشت میں مستحب یہ ہے  کہ قربانی کے گوشت کی طرح اس کے تین حصے کیے جائیں، یعنی ایک حصہ اپنے لیے رکھنا، ایک حصہ عزیز و اقارب میں تقسیم کرنا اور ایک حصہ فقراء میں تقسیم کرنا مستحب ہے، اور اس گوشت سے دعوت کرنا بھی جائز ہے اور ایسی دعوت میں شریک ہونا بھی جائز ہے۔
عقیقہ کے ساتھ یہ بھی مسنون ہے کہ اس دن بچے کا کوئی مناسب اسلامی نام رکھا جائے، نیز اس کے سر کے بال صاف کیے جائیں اور اس کے بال کے وزن کے برابر سونا، چاندی یا اس کی قیمت صدقہ کرنا مستحب ہے۔