سوال: السلام علیکم ورحمۃ اللہ و برکاتہ، مفتی صاحب ! اشراق کی نماز کا وقت اور رکعتوں کی تعداد بتادیں۔

جواب: نماز اشراق ایک نفلی نماز ہے، جو طلوع آفتاب کے بعد اس وقت پڑھی جاتی ہے، جب آفتاب ذرا بلند ہو جائے اور آفتاب میں اتنی تیزی ہو جائے کہ نظر جمانا مشکل ہو، اس کی مقدار ہر مقام اور موسم میں مختلف ہوتی رہتی ہے، اس کا اندازہ بعض حضرات نے طلوعِ آفتاب کے بعد پندرہ سے بیس منٹ کا لگایا ہے، لیکن اصل بات یہی ہے کہ مقام اور موسم کا اعتبار ہوگا، اور اشراق کا وقت نصف النہار تک رہتا ہے۔
نصف النہار کی تعیین کا طریقہ یہ ہے کہ پہلے یہ دیکھ لیا جائے کہ صبح صادق کتنے بجے ہوتی ہے اور سورج کتنے بجے غروب ہوتا ہے، اس کے درمیان کے گھنٹوں کا حساب کرکے ان کا آدھا لے لیا جائے۔
نماز اشراق کی کم از کم دو رکعتیں ہیں اور زیادہ سے زیادہ چار رکعتیں ہیں۔
احادیث میں اس نماز کے بے حد فضائل وارد ہوئے ہیں۔ اشراق میں افضل یہ ہے کہ فجر کی نماز پڑھ کر انسان اسی جگہ بیٹھ کر ذکر کرتا رہے اور طلوع آفتاب کے بعد اشراق پڑھ کر اٹھے، حدیث میں اس کا ثواب حج اور عمرے کے برابر بتایا گیا ہے،
لیکن اگر کوئی شخص کسی وجہ سے ایسا نہ کرسکے، تو گھر آکر یا کوئی دوسرا کام کرکے بھی اشراق کی رکعتیں پڑھ سکتا ہے۔