سوال: السلام علیکم، دوران باجماعت نماز اگر سامنے کوئی سانپ، بچھو، پیلی مکھی (زنبور)، زہریلا حشرات یا کوئی بھی موذی چیز نظر آجائے یا کسی نمازی کے کپڑوں پر نظر آئے یا کوئی چیز بدن پر محسوس ہو، تو اس کے لئے کیا احکامات ہیں؟ رہنمائی فرما دیں۔

جواب: اگر نماز کی حالت میں کاٹ لینے والا کوئی موذی جانور (جیسے سانپ، بچھو وغیرہ ) نظر آئے اور اس سے اذیت پہنچنے کا اندیشہ ہو تو اس کو مارنے کی اجازت ہے، حضرت ابوہریرہ رضی اللہ عنہ سے روایت ہے کہ رسول اللہ ﷺ نے نماز کی حالت میں ’’ اسودین ‘‘ یعنی سانپ اور بچھو کو مار ڈالنے کی اجازت دی ہے، لہذا کوئی بھی موذی جانور نمازی کے سامنے سے گزر رہا ہو اور نمازی کو اس سے اذیت کا اندیشہ ہو تو بلاکراہت اس کو مارنا جائز ہے ، اور اگر اذیت کا اندیشہ نہ ہو تو نماز میں بلا وجہ مارنامکروہ ہے۔
واضح رہے کہ بلا وجہ مارنے کی کراہت اس وقت ہے، جب دوران نماز ہی مارنے کی کوشش کی جائے، البتہ اگر نماز توڑ کر سانپ وغیرہ کو مارا جائے اور بعد میں نماز دہرالی جائے تو اس کی بھی گنجائش ہے۔