سوال: قرآن پاک کو کیسے سمجھا جائے؟ کیا قرآن کا پیغام جاننا اور قرانی تعلیم کی صحیح معلومات حاصل کرنا فرض ہے؟ عام مسلمان مردوں اور خواتین کے لئے قرآن پاک سیکھنے کو شروع کرنے کا صحیح طریقہ کیا ہے؟

جواب: قرآن کریم اللہ تعالیٰ کا کلام ہے، جس کے مخاطب نہ صرف مسلمان ہیں، بلکہ پوری نسل انسانی ہے، یہ پیغامِ ھدایت ہے اور تمام انسانی مسائل کے حل کا سر چشمہ بھی ہے، لہذا جب یہ بات بطور عقیدہ ہمارے ذہن میں آجاتی ہے تو اس کا لازمی تقاضا یہ ہوتا ہے کہ ہم اپنے رب کے اس پیغام کو سمجھنے کی کوشش کریں۔
آنحضرتﷺ نے فرمایا: ’’یا أھل القرآن ! لا تتوسدوا القرأٰن واتلوہ حق تلاوتہ من أٰناء اللیل والنھاروافشوہ وتغنوہ وتدبروا فیہ لعلکم تفلحون‘‘۔ (شعب الایمان، حدیث نمبر:1852)
ترجمہ: اے اہل قرآن! اس قرآن کو پس پشت نہ ڈالو اور اس کی صبح اور شام تلاوت کرو جیسا اس کا حق ہے اور اس کو پھیلاؤ اور اسے خوبصورت آوازوں سے پڑھو اور اس میں تدبر کرو تاکہ تم فلاح پاؤ‘‘۔
آنحضرت ﷺکا مبارک ارشاد ہے: "إن اللّٰہ یرفع بہذا الکتاب أقواما ویضع بہ آخرین‘‘۔(صحیح مسلم، حدیث نمبر:817)
ترجمہ: بلاشبہ اللہ تعالیٰ اس کتاب (قرآن)کے ذریعہ بہت سی قوموں کو بلند کرتا ہے اور اس کے ذریعہ بہت سوں کو گراتا ہے‘‘۔
لہذا اپنے اوقات میں سے باقاعدگی سے کچھ وقت نکال کر قرآن فہمی میں صرف کریں، اس سلسلے میں باقاعدہ قرآنی علوم کو حاصل کریں، علماء کرام کے حلقہ درس میں شامل ہو کر اس کو سمجھیں۔
نیز واضح رہے کہ قرآن کریم کے نفس مفہوم کو سمجھنا اور چیز ہے،لیکن قرآن کریم کی تشریح کا حق اور اس سے مسائل و احکام کے استنباط کا حق اس سے بالکل مختلف چیز ہے اور یہ صرف اس عالم دین کا کام ہے جو قرآن کریم کی تفسیر و تشریح کی شرائط کا حامل ہو اور تفسیر قرآن کے مسلمہ اصولوں کے مطابق وہ اس کی اہلیت و صلاحیت رکھتا ہو۔
چونکہ قرآن کریم کا ترجمہ وتفسیر بیان کرنا بہت ذمہ داری والا کام ہے، لہذا اس کے لیے دینی علوم میں اعلی درجہ کی مہارت درکار ہے جو کہ عام طور پرغیر عالم میں موجود نہیں ہوتی، تاہم اگر کسی جگہ قرآن کریم کا ترجمہ و تفسیر بیان کرنے والا کوئی عالم دین میسر نہ ہو تو کوئی مستند تفسیر لے کر اس کا مطالعہ کریں، جہاں کوئی بات سمجھ نہ آئے تو مستند علماء کرام سے رابطہ کرکے ان سے دریافت کر لیا کریں۔
اس سلسلے میں اردو زبان میں قرآن کریم کی دو تفسیروں کو پڑھنا مفید رہے گا:
۱) آسان ترجمہ قرآن (از مفتی محمد تقی عثمانی صاحب زید مجدھم)
یہ ان لوگوں کے لیے ہے جو مختصر طور پر مطالعہ کرنا چاہیں۔
۲) تفسیر معارف القرآن (مفتی محمد شفیع عثمانی صاحب نور اللہ مرقدہ)
یہ ان لوگوں کے لیے ہے جو مفصّل مطالعہ کرنا چاہیں۔
اس طرح إن شاء الله پابندی سے قرآن فہمی کی کوشش سے دین کا ضروری علم بھی حاصل ہو جائے گا، بلکہ اخلاق و کردار میں بھی غیر معمولی انقلاب پیدا ہوگا اور زندگی میں قرآنی تعلیمات بھی شامل ہو جائیں گی۔