سوال: میں طاہر اپنی بیوی کو منانے کی کوشش میں تھا، میری بیوی سے اکثر میری لڑائی ہوتی تھی، میں غصے میں اکثر اپنی بیوی کو طلاق کی دھمکیاں دیتا تھا، اس روز بھی میں نے اپنی بیوی کے ساتھ لڑائی کی اور میری بیوی نے مجھے کہا کہ تم مجھے روز روز طلا ق کی دھمکیاں دیتے ہو، آج مجھے طلاق دے تو دو، میں بیوی کو منانے کے لیے پانی اس کے پاس لے کے بیٹھا تھا اور اس کو بہلانے اور اس کا غصہ ٹھنڈا کرنے کی کوشش میں لگا ہوا تھا، میں نے اپنی بیوی کو پانی دیا، اس نے پانی ہاتھ سے جھٹک دیا اور کہا نہیں مجھے طلاق دو۔
میں نے اس کو کہا( دی) چپ کر خدا کی بندی اور میری نیت میں نہ طلاق تھی، نہ مجھے اسی کا اندازہ تھا کہ اس سے طلاق ہو جاتی ہے اورمیرے وہم و گمان میں بھی نہیں تھا کہ میں اس کو طلاق کی نیت سے یہ کہہ رہا ہوں اور آج تک یہ بات میرے دماغ میں نہیں آئی، کیونکہ میرا نہ ارادہ تھا، میں بس اس کو یہ بات بھلا رہا تھا، اس نے میرے بھائی کو بتادیا کہ
اس نے اس طرح سے مجھے طلاق دی ہے، اس کے بعد دوسرے ہی دن ہماری صلح ہوگئی، اور ہم رہنا شروع ہوگئے پیار سے، اس کے کئی ماہ کے بعد اب میں نے اپنی بیوی کو دو طلاقیں دے دی ہیں۔
تو میں یہ جاننا چاہتا ہوں
اس پر میرے بھائی نے مجھے بتایا تمہاری بیوی نے مجھے بتایا تھا تم نے اس سے پہلے بھی اسے ایک طلاق دی ہے۔
تو میں نے اس بات کو بنا ارادہ کے کہا تھا، نہ میں غصے میں تھا، میں تو صرف اس کو بہلا رہا تھا کہ کسی طرح سے وہ چپ ہوجائے، کیونکہ وہ بہت رو رہی تھی، اب میں یہ جاننا چاہتا ہوں، کیا وہ طلاق میں آئے گی؟ کیونکہ میرا تو کوئی ارادہ بھی نہ تھا اور نا میری سوچ تھی۔
آپ مجھے یہ جاننا ہے کہ دین میں اس کے بارے میں کیا حکم ہے ؟

جواب: واضح رہے کہ مفتی عالم الغیب نہیں ہوتا، بلکہ وہ سوال میں سائل کی طرف سے دی گئی معلومات کے مطابق جواب دیتا ہے، لہذا سوال میں بیان کردہ تفصیلات کے سچا یا خلافِ واقع ہونے کی ذمہ داری سوال پوچھنے والے پر ہوتی ہے۔
اس وضاحت کے بعد آپ کے سوال کا جواب یہ ہے کہ آپ کا اپنی بیوی کے صریح طلاق کے مطالبہ پر یہ کہنا کہ "دیدی" تو اس سے ایک طلاق واقع ہوگئی، چاہے آپ کی طلاق دینے کی نیت تھی یا نہ تھی، کیونکہ صریح طلاق میں نیت کا اعتبار نہیں ہوتا ہے، پھر اس کے بعد مزید دو طلاقیں دینے سے آپ کی بیوی پر تین طلاقیں مغلظہ واقع ہو گئی ہیں، جس کے نتیجہ میں وہ آپ پر حرام ہوگئی ہے، اب آپ دونوں آپس میں میاں بیوی کے تعلقات قائم نہیں رکھ سکتے۔
ہاں ! اگر وہ کسی اور مرد سے نکاح کرے اور اس سے ازدواجی تعلقات قائم کرے، پھر وہ اسے اپنی مرضی سے طلاق دیدے یا اس کا انتقال ہو جائے، پھر وہ عورت عدت گزار کر آپ سے نکاح کرے، تو ایسا کرنا جائز ہے۔