سوال: السلام علیکم ورحمۃ اللہ، مفتی صاحب! یہ ایک مسئلہ ہے کہ آخرت میں پہلی امتوں کے کفار کہیں گے کہ یا اللہ ہمیں تو کسی نے دعوت نہیں دی، ہمیں اسلام کی دعوت دیتے تو ہم کلمہ پڑھ لیتے تو ان کے جو نبی ہوں گے وہ کہیں گے یا اللہ ہم نے تو ان کو دعوت دی ہے یہ جھوٹ بولتے ہیں تو وہ کہیں گے کہ نہیں انہوں نے ہمیں دعوت نہیں دی، پھر ان انبیاء علیہم السلام سے اللہ پاک فرمائیں گے کہ آپ گواہ پیش کرو تو حضور صلی اللہ علیہ وسلم کی امت یہ آگے کھڑی ہو جائے گی اور کہے گی کہ ہم گواہی دیتے ہیں کہ ان کفار کو ان کے نبیوں نے دعوت دی ہے لیکن انہوں نے قبول نہیں کی ہے تو یہ کفار کہیں گے کہ یہ تو اس وقت تھے ہی نہیں یہ تو بعد میں آئے ہیں ان کو کیا پتہ کہ ہمیں دعوت دی ہے یا نہیں دی ہے؟ تو حضور صلی اللہ علیہ وسلم کے امتی یہ کہیں گے کہ یا اللہ حضور صلی اللہ علیہ وسلم نے ہمیں بتایا ہے کہ پہلی امتوں کو ان کے نبیوں نے دعوت دی ہے انہوں نے قبول نہیں کی، ان کو یہی عذاب ہوں گے، آپ کے نبی نے ہمیں یہ بتایا ہے، ہم اس لیے ابھی بھی گواہی دیتے ہیں کہ ہمارے نبی نے سچ کہا ہے ان کو نبیوں نے دعوت دی ہے لیکن انہوں نے قبول نہیں کی، تو اس بات پر اللہ پاک ان کی گواہی قبول کریں گے اور ان کفار کو جہنم میں ڈال دیں گے۔
مفتی صاحب! یہ واقعہ کون سے کون سی کتابوں میں ہے؟ نیز یہ بات ٹھیک ہے یا ٹھیک نہیں ہے؟ مدلل رہنمائی فرمادیں۔

جواب: سوال میں ذکر کردہ واقعہ صحیح بخاری، ترمذی، سنن ابن ماجہ اور مسند احمد میں مختصر اور تفصیل کے ساتھ مذکور ہے، اس واقعہ میں امت محمدیہ کی یہ خصوصیت بیان فرمائی گئی ہے کہ اس امت محمدیہ کو سب سے زیادہ معتدل اور متوازن امت بنایا گیا ہے جس کے نتیجہ میں ان کو میدانِ حشر میں یہ امتیاز حاصل ہوگا کہ ان کو قیامت کے دن انبیائے کرام علیہم السلام کے گواہ کے طور پر پیش کیا جائے گا۔ ذیل میں صحیح بخاری کی روایت کا ترجمہ ذکر کیا جاتا ہے:
ترجمہ: حضرت ابو سعید خدری رضی اللہ عنہ نے بیان کیا کہ رسول اللہ ﷺ نے فرمایا:“ قیامت کے دن نوح علیہ السلام کو بلایا جائے گا۔ وہ عرض کریں گے کہ اے رب! میں حاضر ہوں۔ اللہ رب العزت فرمائے گا، کیا تم نے میرا پیغام پہنچا دیا تھا؟ نوح علیہ السلام عرض کریں گے کہ میں نے پہنچا دیا تھا، پھر ان کی امت سے پوچھا جائے گا، کیا انہوں نے تمہیں میرا پیغام پہنچا دیا تھا؟ وہ لوگ کہیں گے کہ ہمارے پاس کوئی ڈرانے والا نہیں آیا۔ اللہ تعالیٰ (نوح علیہ السلام سے) فرمائے گا کہ آپ کے حق میں کوئی گواہی بھی دے سکتا ہے؟ وہ کہیں گے کہ محمد ( ﷺ ) اور ان کی امت میری گواہ ہے۔ چنانچہ آپ ﷺ کی امت ان کے حق میں گواہی دے گی کہ انہوں نے پیغام پہنچا دیا تھا اور رسول (یعنی آپ ﷺ ) اپنی امت کے حق میں گواہی دیں گے (کہ انہوں نے سچی گواہی دی ہے) یہی مراد ہے اللہ کے اس ارشاد سے «وكذلك جعلناكم أمة وسطا لتكونوا شهداء على الناس ويكون الرسول عليكم شهيدا‏» کہ ”اور اسی طرح ہم نے تم کو امت وسط بنایا تاکہ تم لوگوں کے لیے گواہی دو اور رسول تمہارے لیے گواہی دیں ”۔(صحیح بخاری، حدیث نمبر:4487)