سوال: مفتی صاحب! پوچھنا یہ ہےکہ رزق میں اضافے کا وظیفہ ہے کہ گھر میں آکر سلام کرنا اور سورہ اخلاص پڑھنا۔ اب یہ رہنمائی فرمادیں کہ سلام کے بعد درود شریف پڑھنا حدیث مبارکہ سے ثابت ہے یا نہیں ؟ نیز سورہ اخلاص کتنی دفعہ پڑھنی چاہیے؟

جواب: واضح رہے کہ رزق میں فراخی و دیگر امور کی تکمیل کے لیے مشایخ کی جانب سے دیئے جانے والے وظائف کا صرف احادیث مبارکہ میں موجود ہونا ضروری نہیں ہے، بلکہ اس کا تعلق تجربات و مشاہدات سے بھی ہوتا ہے، تاہم یہ بات بھی ضروری نہیں کہ ہر عمل کے مفید و قابلِ عمل ہونے کے لئے اسے رسول اللہ ﷺ کی جانب منسوب کیا جائے۔
اسی تناظر میں سوال میں ذکر کردہ روایت پر عمل کرنا درست بھی ہے اور بزرگوں کے تجربات بھی اس پر شاہد ہیں کہ یہ وظیفہ نہایت مفید ہے، البتہ رسول اللہﷺ تک پہنچنے والی اس کی سند کمزور ہے، لہذا اس وظیفہ کو رسول اللہﷺ کی جانب منسوب کیے بغیر عمل میں لانا درست ہے۔ اس سے متعلق حدیث اور اس کی سند سے متعلق تفصیل ذیل میں ذکر کی جاتی ہے:

گھر میں داخل ہوتے وقت سورہ اخلاص کی تلاوت سے متعلق پانچ صحابہ کرام رضی اللہ عنہم سے مختلف الفاظ ومفاہیم کے ساتھ روایات منقول ہیں، جن میں سے ایک روایت میں درود شریف پڑھنے کا بھی تذکرہ ملتا ہے، ان صحابہ کرام رضی اللہ عنہم کے اسماء گرامی اور متن حدیث درج ذیل ہے:
(1) "تفسیر الثعلبي" میں روایت ہے:
عن سهل بن سعد الساعدي-رضي الله عنه، قال: شكا رجل إلى رسول الله ﷺ الفقر وضيق المعيشة، فقال له رسول الله ﷺ: "إذا دخلت البيت فسلّم إن كان فيه أحد، وإن لم يكن فيه أحد فسلم علي، واقرأ "قل هو الله أحد" مرة واحدة ، ففعل الرجل فأدر الله عليه الرزق، حتى أفاض عليه جيرانه"
(الكشف والبيان عن تفسير القرآن،، لأبي إسحاق أحمد بن محمد الثعلبي(المتوفى: 427هـ)، سورة الإخلاص،331/10، تحقيق: الإمام أبي محمد بن عاشور،الناشر: دار إحياء التراث العربي، بيروت – لبنان)
ترجمہ: حضرت سہل بن سعد ساعدی رضی اللہ عنہ سے روایت ہے کہ ایک شخص نے رسول اللہ ﷺ کی خدمت میں فقر و تنگی کی شکایت کی تو آپ نے ارشاد فرمایا: جب گھر میں داخل ہو سو گھر میں کوئی شخص موجود ہو تو اس کو سلام کرو، اور اگر کوئی نہ ہو تو مجھ پر سلام پیش کرو ( یعنی درود شریف پڑھو)، اور سورہ اخلاص" قل هو الله أحد" ایک بار پڑھو، اس شخص نے اسی طرح کیا تو اللہ رب العزت نے اس پر رزق کی فراوانی فرمادی، حتی کہ اس پڑوسیوں کو بھی فیض یاب کیا۔
(2) "المجعم الکبیر للطبراني" میں روایت ہے:
عن جرير بن عبد الله، قال: قال رسول الله صلى الله عليه وسلم: «من قرأ "قل هو الله أحد" حين يدخل منزله، نفت الفقر عن أهل ذلك المنزل والجيران»
(المجعم الکبیر، لسليمان بن أحمد الطبراني (المتوفى: 360هـ)، 340/2، المحقق: حمدي بن عبد المجيد السلفي، دار النشر: مكتبة ابن تيمية - القاهرة)
ترجمہ: حضرت جریر بن عبداللہ سے روایت ہے کہ رسول اللہﷺ نے ارشاد فرمایا: جس شخص نے گھر میں داخل ہوتے وقت سورہ اخلاص"قل هو الله أحد" پڑھی تو اس گھر اور پڑوس سے فقر وغربت دور ہوجائے گی۔
3) "فضائل سورة الإخلاص للحسن الخلال" میں روایت ہے:
عن أنس، قال: قال رسول الله صلى الله عليه وسلم «من قرأ "قل هو الله أحد" مرة بورك عليه، ومن قرأها مرتين، بورك عليه وعلى أهل بيته، ومن قرأها ثلاث مرات بورك عليه، وعلى أهل بيته وجيرانه، ومن قرأها اثنتي عشرة مرة بني له في الجنة اثنا عشر قصرا۔۔۔۔» (فضائل سورة الإخلاص، لأبي محمد الحسن الخَلَّال (المتوفى: 439هـ)، 40/1، المحقق: محمد بن رزق بن طرهوني، الناشر: مكتبة لينة - القاهرة – دمنهور)
ترجمہ: حضرت انس رضی اللہ عنہ سے روایت ہے کہ رسول اللہﷺ نے ارشاد فرمایا: جس نے ایک دفعہ "قل هو الله أحد (مکمل سورت)"، پڑھی، اس پر رحمت وبرکت نازل ہوگی اور جس شخص نے دو دفعہ اس کو پڑھا تو اس پر اور ا س کے اہل خانہ پر برکت برستی ہے اور جس نے تین بار اس کو پڑھا تو اس پر، اس کے اہلِ خانہ پر اور اس کے پڑوس پر برکت نازل ہوتی ہے اور جس نے اس کو بارہ دفعہ پڑھا تو اس کے لیے جنت میں بارہ محلات تعمیر کیے جاتے ہیں۔
4) فضائل سورة الإخلاص للحسن الخلال میں روایت ہے:
عن أبي هريرة، قال: قال رسول الله صلى الله عليه وسلم «من أتى منزله، فقرأ الحمد و"قل هو الله أحد"، نفى الله عنه الفقر، وكثر خير بيته، حتى يفيض به على جيرانه»
(فضائل سورة الإخلاص، لأبي محمد الحسن الخَلَّال (المتوفى: 439هـ، 91/1، المحقق: محمد بن رزق بن طرهوني، الناشر: مكتبة لينة - القاهرة – دمنهور)
ترجمہ:حضرت ابوہریرہ رضی اللہ عنہ سے روایت ہے کہ رسول اللہﷺ نے ارشاد فرمایا: جو اپنے گھر آیا اور اس نے سورہ فاتحہ اور سورہ اخلاص پڑھی، اس سے فقر وتنگدستی کو دور کردیا جاتا ہے اور اس کے گھر میں خیر کو عام کردیا جاتا ہے، یہاں تک اس کی بدولت اس کے پڑوسی بھی خیر سے مستفید ہوتے ہیں۔
5۔ "شعب الإیمان للبیهقي" میں روایت ہے:
عن عبد الكريم يرفعه إلى ابن عباس، قال: "من صلى ركعتين، فقرأ فيهما "قل هو الله أحد" ثلاثين مرة، بني له ألف قصر من الذهب في الجنة، ومن قرأها في غير الصلاة، بني له مائة قصر في الجنة، ومن قرأها إذا دخل على أهله، أصاب أهله وجيرانه منها خير "
(شعب الإیمان، لأبي بكر أحمد بن الحسين البيهقي (المتوفى: 458هـ) 156/4، حققه: الدكتور عبد العلي عبد الحميد حامد، مكتبة الرشد للنشر والتوزيع بالرياض)
ترجمہ:راوی عبد الکریم ابن عباس رضی اللہ عنہما سے روایت نقل کرتا ہے کہ انہوں نے فرمایا: جس نے دو رکعت نماز پڑھی، اس میں سورہ اخلاص کی تیس دفعہ تلاوت کی تو اس کے لئے جنت میں ایک ہزار سونے کے محلات تعمیر کیے جائیں گے، اور جس نے نماز کے علاوہ تیس دفعہ اس سورت کو تلاوت کیا تو اس کے لیے ایک سو جنت میں محل تیار کیے جائیں گے اور جس شخص نے گھر میں داخل ہوتے وقت اس سورت کو تلاوت کیا تو یہ سورت اس کے اہل خانہ اور پڑوس کو خیر پہنچنے کا سبب ہو گی۔