سوال: مفتی صاحب! ایک مرد عورت سے شادی کے فوراً بعد جرمنی چلا گیا ہے، چھ سال ہوگئے ہیں اور اس عورت سے اولاد بھی نہیں ہے، اب نہ تو وہ واپسی آتا ہے اور نہ وہ عورت کو طلاق دیتا ہے حتیٰ کہ عورت طلاق مانگ بھی چکی ہے، کیا اس مرد کے طلاق دیے بغیر عورت کا نکاح دوسرے مرد کے ساتھ کر سکتے ہیں؟
تنقیح:آپ کے سوال میں کچھ ابہام ہیں آپ درج ذیل باتوں کی وضاحت فرمائیں :
1) کیا مذکورہ خاتون کا شوہر بیوی کا نان نفقہ ادا کر رہا ہے؟
2) کیا شوہر کی طرف سے بیوی کو رہائش کی سہولت فراہم کی گئی ہے؟ اس وضاحت کے بعد آپ کے سوال کا جواب دیا جائے گا۔
جواب تنقیح:
اس کو شوہر کی طرف سے خرچہ مکمل مل رہا ہے، لیکن جنسی خواہش کا مسلہ ہے۔

جواب: واضح رہے کہ جب تک عورت کا سابقہ نکاح برقرار ہو، عورت کے لیے دوسری جگہ نکاح کرنا حرام اور سخت گناہ کا کام ہے، جبکہ دوسری جگہ نکاح سے پہلے ضروری ہے کہ عورت کی سابقہ شوہر سے طلاق/خلع ہو جائے اور اس کی عدت بھی گزر جائے۔
پوچھی گئی صورت میں اگر شوہر واپس پاکستان آنے کے لیے تیار نہیں ہے اور نہ ہی بیوی کو اپنے پاس جرمنی بلاتا ہے تو بیوی کو چاہیے کہ خاندان کے بزرگوں کے ذریعہ شوہر سے علیحدگی کی کوئی صورت نکال لے، اگر شوہر طلاق دے دیتا ہے تو ٹھیک، ورنہ اسے خلع پر راضی کرلے، اس کے بعد جب عدت گزر جائے تو پھر بیوی کے لیے کسی دوسرے مرد سے نکاح کرنا جائز ہو جائے گا، لیکن اگر شوہر خلع کے لیے بھی راضی نہ ہو، اور جنسی خواہش کی عدم تکمیل کی وجہ سے عورت کے لیے مزید صبر کرنا ممکن نہ ہو، اور گناہ میں مبتلا ہونے کا قوی اندیشہ ہو تو چونکہ جماع اور جنسی خواہش کی تکمیل نکاح کے مقاصد میں سے ہے اور منکوحہ عورت کا حق ہے، شوہر پر اس کی ادائیگی لازم ہے، عورت کے اس حق کو مسلسل نظر انداز کرنے سے آدمی ظالم اور ہٹ دھرم شمار ہوگا، اس لیے عورت عدالت سے رجوع کرکے مسلمان قاضی کے ذریعہ نکاح فسخ کروا سکتی ہے۔
چنانچہ کفایت المفتی میں ہے: "اس صورت میں امام مالک رحمہ اللہ کے مذہب کے موافق نکاح فسخ کیا جاسکتا ہے کیونکہ جوان عورت کے حقوق زوجیت ادا نہ کئے جائیں اور اس کے زنا میں مبتلا ہوجانے کا خدشہ ہو تو مسلمان حاکم نکاح کر سکتا ہے اور حنفیہ بھی ضرورت شدیدہ میں اس پر عمل کر سکتے ہیں۔" (کفایت المفتی: 120/6، ط: دارالاشاعت)
البتہ نکاح فسخ کرنے کے لیے درج ذیل طریقہ اختیار کرنا پڑے گا:
سب سے پہلے عورت مسلمان جج کی عدالت میں "عرصہ دراز سے جنسی خواہش کی عدم تکمیل" کو بنیاد بنا کر نکاح فسخ کرنے کا مقدمہ دائر کرے اور اپنے اس دعویٰ کو گواہوں سے ثابت کرے، اس کے بعد جج شوہر کو عدالت میں حاضر ہونے کا نوٹس جاری کرے، اگر وہ عدالت میں آجاتا ہے تو جج اس سے کہے کہ یا تو اپنی بیوی کی شکایت دور کرکے اسے اپنے پاس رکھو یا اسے طلاق یا خلع دو، ورنہ ہم تم دونوں کے درمیان تفریق کردیں گے، اب اگر شوہر نہ بیوی کو اپنے پاس رکھنے کے لیے راضی ہو اور نہ ہی اس کو طلاق یا خلع دے تو مسلمان جج ان کے درمیان تفریق کرادے، لیکن اگر بار بار نوٹس کے باجود شوہر عدالت میں حاضر نہ ہو تو مسلمان جج بیوی کے گواہوں کی بنیاد پر میاں بیوی کے درمیان نکاح فسخ کرکے تفریق کرادے، تفریق کے بعد عورت عدت گزار کر کسی اور جگہ نکاح کرسکے گی۔