سوال: مجھے میرے شوہرنے کچھ وجوہات کی بنا پر نومبر 2021 میں طلاق دے دی، یہ طلاق بذریعہ تحریری کاغذات میرے شوہر کی جانب سے مجھے موصول ہوئی تھی، جس میں انگریزی میں تین مرتبہ ۔۔۔۔بیوی کا نام۔۔۔ divorce to ۔۔۔۔۔شوہر کا نام۔۔۔۔ لکھا تھا، طلاق کے وقت میں حاملہ تھی۔ اللہ کے فضل سے اب میری ایک بیٹی ہے جس کی عمر تین سال ہے۔ طلاق کے بعد میری عدت (جو کہ حمل کی صورت میں ولادت تک ہوتی ہے) مکمل ہو چکی تھی، اب تقریباً چار سال کا عرصہ گزر چکا ہے، میں اور میرے سابقہ شوہر آپس کی رضامندی سے دوبارہ صلح اور نکاح کرنا چاہتے ہیں۔
میں اور میرے شوہر دونوں ایک دوسرے سے بہت محبت کرتے ہیں، ہمارا دھیان اب زنا کی طرف جارہا ہے کیوں کہ ہم ایک دوسرے سے دور نہیں رہ سکتے ہیں، میں اپنے شوہر سے بہت محبت کرتی ہوں اور میرا یہ سوچنا ہے کہ میں کسی اور سے نکاح کرلوں یا حلالہ کا سوچوں، میرے لئے ممکن ہے نہیں ہے۔ میں بہت پریشان ہوں، میرا دھیان خودکشی یا میرے سابقہ شوہر سے زنا کی طرف جا رہا ہے۔
میں اپنی اور اپنے سابقہ شوہر کی آخرت نہیں خراب کرنا چاہتی، زنا سے بچانا چاہتی ہوں اور اسی کے ساتھ واپس رہنا چاہتی ہوں، اس کے بغیر زندگی کا تصور کرنا مشکل ہے، میرا معاملہ بہت سنگین ہے، کیا اس صورت میں بھی واپس رجوع کا راستہ نہیں؟
میرے شوہر بھی مجھ سے نکاح کرنا چاہتے ہیں اور وہ بھی اس معاملے پہ سنگین ہیں، اسلام تو ہمارے لیے کوئی مشکل نہیں پیدا کرتا، اسلام تو آسانی کا دین ہے اور اللّٰہ تو ہم سے ستر ماؤں سے بھی زیادہ محبت کرتا ہے تو وو ہمیں کیوں کوئی تکلیف دے گا؟ برائے مہربانی ہمارے پورے معاملے کو دھیان سے توجہ دیں اور کوئی حل بتادیں۔ شکریہ
میری گزارش ہے کہ قرآن و سنت کی روشنی میں رہنمائی فرمائیں کہ کیا ہمارے لیے اب دوبارہ نکاح کرنا جائز ہے؟ اور اگر نکاح جائز ہے تو اس کے لیے کون سا شرعی طریقہ کار اختیار کرنا ہوگا؟ برائے مہربانی مکمل شرعی رہنمائی فرما دیجیے۔

جواب: سوال میں ذکر کردہ صورت میں تین طلاقیں واقع ہوچکی ہیں اور میاں بیوی کے درمیان حرمتِ مغلّظہ ثابت ہوگئی ہے، اب نہ رجوع ہوسکتا ہے اور نہ ہی دوبارہ نکاح ہوسکتا ہے۔
ہاں! اگر عورت عدت گزار کر کسی اور مرد سے نکاح کرے اور اس سے ازدواجی تعلقات قائم کرے، پھر وہ اسے اپنی مرضی سے طلاق دیدے یا اس کا انتقال ہوجائے تو ایسی صورت میں وہ عورت عدت گزار کر دوبارہ سابقہ شوہر سے نکاح کرنا چاہے تو کرسکتی ہے۔
نیز واضح رہے کہ شریعت کی نظر میں ایک ہی مجلس میں دی گئی تین طلاقیں تین ہی شمار ہوتی ہیں اور اس کے بعد بیوی اپنے شوہر پر حرام ہو جاتی ہے، یہی حکم قرآن کریم اور احادیث نبویہ سے ثابت ہے اور اسی پر جمہور صحابہ و تابعین (رضوان اللہ علیہم اجمعین) کا اجماع ہے اور ائمہ اربعہ رحمہم اللہ تعالی کا بالاتفاق یہی مسلک ہے۔

مزید یہ کہ اس میں کوئی شک نہیں کہ اللہ رب العزت نے دین میں آسانی پیدا کی ہے، لیکن نظامِ حیات کو درست سمت پر چلانے کے لیے اللہ تعالٰی نے انسان کے قول اور فعل کو بھی شریعت کا پابند بنایا ہے، چنانچہ خلاف ورزی کی صورت میں اس کی سزائیں بھی مقرر کی ہیں، مثلاً: زنا، چوری اور تہمت وغیرہ کی سزائیں۔
چونکہ ایک ساتھ تین طلاقیں دینا بھی شرعاً ممنوع اور ناجائز ہے، اس لیے اس قولی جرم کی سزا بھی شریعت نے مقرر کی ہے، تاکہ نظامِ حیات درست رہے اور میاں بیوی نکاح کی نعمت کی ناقدری سے بچیں۔