سوال: حضرت ! یہ فرمائیے کہ بعض اوقات انسان جماعت کے ساتھ نماز پڑھ رہا ہوتا ہے اوربعض لوگ نیت باندھنے کے بعد اپنے ساتھ کی تھوڑی تھوڑی خالی جگہ کو پر کرتے ہیں، جس کی وجہ سے اس کے ساتھ جگہ خالی ہوجاتی ہے، اس جگہ کو پر کرنے کے لئے آدمی کتنا نماز میں حرکت کرسکتا ہے؟ اسی طرح اگر انسان نماز میں کھڑا ہے اور اس کے سامنے ایک جگہ خالی ہوجائے، تو آدمی کیا اس جگہ کو پر کر سکتا ہے؟ اور اگر کر سکتا ہے، تو انسان اس طریقے سے آگے کی کتنی صفوں تک چل کے جا سکتا ہے؟ جزاک اللہ خیر

جواب: صفوں کی درستی اور انہیں پُر کرنا شریعت کے احکامات میں سے ایک اہم حکم اور نماز کا حصہ ہے، نبی کریم ﷺنے صفوں کے درست کرنے کو نماز کی تکمیل قرار دیاہے اور اگلی صف میں جگہ موجود ہوتے ہوئے پچھلی صف میں کھڑے ہونے سے منع فرمایاہے، لہذا اگر اگلی صف میں جگہ خالی ہو، اور کوئی شخص اُس خالی جگہ کو پُر کرنے کے لیے ( صفوں کی درستگی کے لیے)، استِقبالِ قبلہ پر بر قرار رہتے ہوئے،دورانِ نماز ایک صف کی حد تک چلے تو نماز نہیں ٹوٹتی اور اس سے زیادہ اگر لگاتار چلےتو نماز ٹوٹ جاتی ہے، البتہ اگر ایک صف کے بقدر چل کر ٹھہر جائے، پھر آگے ٹھہر ٹھہر کر مزید چلے تو نماز نہیں ٹوٹتی۔