سوال: سوال یہ ہے کہ مسلمانوں کا قبلہ حضرت ابراھیم علیہ سلام کے زمانے میں کعبہ تھا، پھر بیت المقدس کب اور کیوں ہوا؟ پھر بیت المقدس کے بعد کعبہ کیوں ہوا؟ اب مسلمانوں کے لیے بیت المقدس کی کیا فضیلت اور اہمیت ہے؟ وضاحت فرمائیں۔

جواب: واضح رہے کہ حضرت آدم علیہ السلام سے لے کرنوح علیہ السلام تک سب کا قبلہ یہی بیت اللہ تھا، طوفانِ نوح میں پوری دنیا ڈوبنے سے تباہ ہوگئی جس کی وجہ سے بیت اللہ کی عمارت بھی منہدم ہوگئی، اس کے بعد حضرت ابراہیم اور حضرت اسماعیل علیہما السلام نے دوبارہ بحکمِ خداوندی بیت اللہ کی تعمیر کی اور یہی ان کا اور ان کی امت کا قبلہ رہا اوراس کے بعد انبیائےبنی اسرائیل کے لیےبیت المقدس ہی کو قبلہ قرار دیا گیا ۔
جناب رسول اللہ ﷺ کس جانب منہ کرکے نماز پڑھتے تھے؟ آیا شروع سے ہی بیت ا لمقدس کی طرف منہ کرکے نماز پڑھا کرتے تھے یا بیت اللہ کی طرف؟
حضرت عبداللہ بن عباس رضی اللہ عنہ فرماتےہیں کہ نماز فرض ہونےکے بعد پہلے آپ ﷺ کا قبلہ بیت المقدس تھا جو مدینہ ہجرت کے بعد بھی سولہ سترہ مہینہ تک باقی رہا، البتہ جناب رسول اللہ ﷺ مکہ مکرمہ میں حجرِ اسود اور رکن یمانی کے درمیان نماز پڑھتے تھے، تاکہ بیت اللہ بھی سامنے رہے اور بیت المقدس کا بھی استقبال ہوجائے، مدینہ منورہ پہنچنے کے بعد یہ ممکن نہ رہا ،اس لیے بیت اللہ کو قبلہ بنانے کے احکام نازل ہوئے۔
جبکہ دوسرے حضرات کی رائے یہ ہے کہ نماز فرض ہونے کے بعد مکہ مکرمہ میں بھی مسلمانوں کا ابتدائی قبلہ بیت اللہ ہی تھا،کیونكہ حضرت ابراہیم واسماعیل علیہما السلام کا قبلہ بھی بیت اللہ ہی رہا تھا اور آپ ﷺ جب تک مکہ مکرمہ میں مقیم رہے بیت اللہ ہی کی طرف نماز پڑھتے رہے، پھر ہجرت کے بعد آپ کا قبلہ بیت المقدس قرار دے دیا گیا اور مدینہ منورہ میں سولہ سترہ مہینے آپ نے بیت المقدس کی طرف نماز پڑھی، اس کے بعد پھر آپ کا جو پہلا قبلہ تھا یعنی بیت اللہ اسی کی طرف نماز میں توجہ کرنے کا حکم آگیا۔علامہ ابن عبدالبر(م 463 ھ)نے اس قول کو اصح قراردیا ہے اور علامہ قرطبی (م671 ھ) نے بحوالہ ابو عمرو اسی قول کو اصح القولین قرار دیا ہے ۔
بیت المقدس کوقبلہ قراردینے کی حکمت یہ بیان کی جاتی ہے کہ جناب رسول اللہ ﷺ جب مدینہ منورہ میں تشریف لائے تو آپ کو قبائلِ یہود سے سابقہ پڑا،اس وجہ سے آپ ﷺنے ان کو مانوس کرنے کے لیے اللہ تعالی ٰ کے حکم سے ان ہی کا قبلہ اختیار کرلیا، مگر پھر تجربہ سے ثابت ہوا کہ یہ لوگ اپنی ہٹ دھرمی سے باز آنے والے نہیں تو پھر آپ کو اپنے اصلی قبلہ یعنی بیت اللہ کی طرف رخ کرنے کا حکم مل گیا، جو آپ کو اپنے آباء حضرت ابراہیم واسماعیل علیہما السلام کا قبلہ ہونے کی وجہ سے طبعی طورپرمحبوب تھا۔
جن حضرات نے پہلا قول اختیار کیا ہے ان کے نزدیک حکمت یہ تھی کہ مکہ مکرمہ میں تو مشرکین سے امتیاز اور ان سے مخالفت کا اظہار کرنا تھا، اس لیے ان کا قبلہ چھوڑ کر بیت المقدس کو قبلہ بنادیا گیا، پھر ہجرت کے بعد مدینہ طیبہ میں یہود و نصاریٰ سے امتیاز اور ان کی مخالفت کا اظہار مقصود ہوا تو ان کا قبلہ بدل کر بیت اللہ کو قبلہ بنادیا گیا ۔
بیت المقدس کے فضائل:
۱)مسلمانوں کےلیے فضیلت یہ ہےکہ مسجد اقصی مسلمانوں کا کچھ عرصے کے لیے قبلہ رہا ہے۔
۲) جس طرح مسجد حرام میں نماز پڑھنے کی فضیلت ہے اسی طرح مسجد اقصی میں بھی نماز پڑھنے کی فضیلت آئی ہے ، حدیث شریف میں آ تا ہے کہ حضرت ابوذر رضی اللہ عنہ فرماتے ہیں کہ ہم لوگ رسول اللہ ﷺ کے پاس بیٹھے یہ گفتگو کررہے تھے کہ مسجد نبوی افضل ہے یا بیت المقدس؟ تو آپ ﷺ نے ارشاد فرمایا:میری اس مسجد میں ایک نماز بیت المقدس میں پڑھی گئی چار نمازوں کے برابر ہے،ہاں وہ نماز پڑھنے کی بہترین جگہ ہے اور وہ وقت قریب ہے کہ ایک مؤمن کے لیے اتنی جگہ بھی ملنا مشکل ہوگی کہ وہ وہاں سے بیت المقدس کو دیکھ لے، اگر صرف اتنی جگہ بھی مل گئی تو وہ اس کے نزدیک دنیا اور دنیا کی تمام چیزوں سے بہتر ہوگا‘‘ ، اس حدیث کی روشنی میں مسجد اقصی میں نماز پڑھنے کا ثواب ڈھائی سو بنتا ہے۔
۳) بیت المقدس وہ جگہ ہے جہاں سے آپ ﷺ کا سفرِ معراج شروع ہوا تھا اور جہاں آپ ﷺ نے انبیائے کرام علیہم السلام کی امامت فرمائی تھی۔
۴) مسجد اقصی ان تین مساجد میں سے ایک ہےجس کی طرف عبادت کی نیت سے سفر کرکے جانا جائز ہے، حدیث شریف میں آتا ہے کہ تین مسجدوں کے سوا کسی کے لیے کجاوے نہ باندھے جائیں۔ (یعنی سفر نہ کیا جائے) ایک مسجد الحرام، دوسری رسول اللہ صلی اللہ علیہ وسلم کی مسجد (مسجد نبوی) اور تیسری مسجد الاقصیٰ یعنی بیت المقدس۔
۵) بيت المقدس ان چار مسجدوں(مسجد حرام، مسجد نبوی، مسجد اقصیٰ اور کوہ طور) ميں سے ہے، جہاں دجال داخل نہیں ہوسکتا ہے۔
احادیث مبارکہ میں اور بھی فضائل بیان کیے گئے ہیں، جن سے یہ واضح ہوجاتا ہے کہ بیت المقد س سے مسلمانوں کا رشتہ ایمانی اور مذہبی ہے۔