سوال: حضرت ، میرے دوست کے والد ریٹائر ہورہے ہیں ، ریٹائرمنٹ میں ان کو جو پیسے کمپنی کی طرف سے ملیں گے،کیا وہ فکسڈ ڈپازٹ رکھ کر انٹرسٹ لیکر اپنا گزر بسر کر سکتے ہیں ؟ وہ شوگر اور بلڈ پریشر کے مریض اور تھوڑے کمزور بھی ہیں ، اسلیے ریٹائرمنٹ کے بعد کام کرنا مشکل ہے ، ان کے 4 بیٹے ہیں، جس میں سے بڑا بیٹا بیروزگار ہے اور جو برسرروزگار ہیں، وہ اتنا کماتے ہیں کہ اپنے بِیوِی بچوں کا خرچہ پورا ہوتا ہے، لہذا آپ تفصیلی رہنمائی فرما دیں کہ اس کنڈیشن میں بینک میں فکسڈ ڈپازٹ رکھ کر وہ اپنا اور اپنی وائف کا خرچہ کر سکتے ہیں،ان کو کچھ اماؤنٹ پینشن بھی ملے گی، لیکن اس سے خرچہ پورا نہیں ہوگا ۔ جزاک اللہ

جواب: واضح رہےکہ سودی بینک میں فکسڈ ڈپازٹ اکاؤنٹ میں رقم رکھوانے پر سود ملتا ہے، اس لیے اس میں رقم رکھوانا کسی بھی صورت میں جائز نہیں ہے، اور سوال میں جس مجبوری کا ذکر کیا گیا ہے، اس مجبوری کے لیے دیگر جائز متبادل حل موجود ہیں، وہ یہ کہ جو رقم اپنی ملکیت میں ہے، وہ کسی قابلِ اعتماد شخص کو نفع ونقصان میں شرکت کی بنیاد پر اس کے ساتھ مخصوص منافع مقرر کرکے کاروبار کے لیے دیا جائے، یا کسی جائز کاروبا ر والی کمپنی کے شئیرز خریدے جائیں یا یہ کہ جو آج کل غیر سودی بینک (بینک اسلامی او میزان بینک وغیرہ) معتبر علمائے کرام کی زیرنگرانی کام کرتے ہیں، اپنی رقم ان میں شرکت یا مضاربت کی بنیاد پر لگائی جائے، لہٰذا ان جائز ذرائع کو اختیا ر کرکے گھریلوں ضروریات کو پورا کرنا چاہئے، اور حرام سے بالکل گریز کرنا چاہئے۔