سوال: ایک واقعہ کا مفہوم ہے کہ مسلمانوں کے اور کافروں کے درمیان لڑائی تھی تو مسلمانوں کی طرف سے ایک صحابی نے ایک خط لکھا اور وہ خط ایک عورت کو دیا کہ یہ جا کر کافروں کو دے دو تو حضور صلی اللہ علیہ وسلم کو اللہ نے یہ سارا واقعہ بتادیا، پھر حضور صلی اللہ علیہ وسلم نے حضرت علی رضی اللہ عنہ سے فرمایا کہ اے علی فلاں جگہ پہ کھڑے ہو اور ایک عورت آئے گی، اس کی یہ شان و شوکت ہوگی، اس کے پاس خط ہوگا، اس سے وہ خط لے آنا۔ علی رضی اللہ عنہ اس مقام پہ گئے اور وہاں جا کر کھڑے ہوئے تو وہ عورت اسی شان و شوکت میں آئی تو حضرت علی رضی اللہ عنہ نے اس کو پکڑا اور اس سے کہا کہ آپ کے پاس خط ہے وہ مجھے دو، اس نے کہا میرے پاس خط نہیں ہے۔ علی رضی اللہ عنہ نے تلاشی لی تو اس سے خط ثابت نہیں ملا۔ علی رضی اللہ عنہ نے کہا کہ یہ خط مجھے تم سے لینا ہے اور تمہارے پاس ہے کیونکہ میرے نبی نے فرمایا کہ تمہارے پاس خط ہے اور تم کہہ رہی ہے کہ میرے پاس خط نہیں ہے، میں تمہارے کپڑے اتار دوں گا اور تمہیں ننگا کر دوں گا، لہذا مجھے خط دے دو تو اس عورت نے جب دیکھا کہ یہ جو مجھے چھوڑنے والا نہیں ہے تو اس اپنے بالوں میں سے خط نکالا اور علی رضی اللہ عنہ کو دیا تو علی رضی اللہ عنہ نے وہ خط اس عورت سے لے کر حضور صلی اللہ علیہ وسلم کو دے دیا۔
یہ واقعہ ہم نے پہلے سنا تھا کہ اس عورت نے یہ خط بالوں میں رکھا ہوا تھا اور ابھی یہ سنا ہے کہ نیفے میں تھا، پہلے علی رضی اللہ عنہ کے حوالہ سے سنا تھا اور اب عمر رضی اللہ عنہ کے حوالہ سے سنا ہے۔ اس کی ذرا تحقیق فرمادیں۔

جواب: سوال میں ذکر کردہ واقعہ صحیح بخاری میں حضرت علی رضی اللہ عنه سے منقول ہے، اور یہ واقعہ صحیح بخاری میں ہی دونوں طرح کے الفاظ حجزة (ازار بند) اور عقاص (سر کے بالوں کی چوٹی) کے ساتھ نقل کیا گیا ہے۔ شارحینِ حدیث نے ان دونوں الفاظوں میں تین تطبیقات ذکر کی ہیں، جو درج ذیل ہیں:
(1) اس عورت نے خط کو ازار بند سے نکال کر بالوں میں چھپالیا یا اس کا برعکس کیا۔
(2) اس عورت کے سر کی چوٹی اتنی لمبی تھی کہ وہ ازار بند باندھنے کی جگہ تک پہنچتی تھی، اس عورت نے اپنے لمبے بالوں کے آخر میں اس خط کو باندھ کر کمر پر رکھ لیا۔ فتح الباری میں ابن حجرؒ نے اس قول کو راجح قرار دیا ہے۔
(3) اس خاتون کے حوالے دو خط کیے گئے تھے، جن میں ایک خط سر کے بالوں میں اور دوسرا ازار بند کے اندر رکھا تھا۔
ذیل میں صحیح بخاری کی پوری حدیث کا ترجمہ ذکر کیا جاتا ہے:
ترجمہ: حضرت علی رضی اللہ عنہ نے فرمایا کہ مجھے، ابومرثد رضی اللہ عنہ اور زبیر رضی اللہ عنہ کو رسول اللہ صلی اللہ علیہ وسلم نے ایک مہم پر بھیجا۔ ہم سب شہسوار تھے۔ نبی کریم صلی اللہ علیہ وسلم نے فرمایا کہ تم لوگ سیدھے چلے جاؤ۔ جب روضہ خاخ پر پہنچو تو وہاں تمہیں مشرکین کی ایک عورت ملے گی، وہ ایک خط لیے ہوئے ہے جسے حاطب بن ابی بلتعہ نے مشرکین کے نام بھیجا ہے۔ چنانچہ نبی کریم صلی اللہ علیہ وسلم نے جس جگہ کا پتہ دیا تھا، ہم نے وہیں اس عورت کو ایک اونٹ پر جاتے ہوئے پا لیا۔ ہم نے اس سے کہا کہ خط دے دو۔ وہ کہنے لگی کہ میرے پاس تو کوئی خط نہیں ہے۔ ہم نے اس کے اونٹ کو بیٹھا کر اس کی تلاشی لی تو واقعی ہمیں بھی کوئی خط نہیں ملا، لیکن ہم نے کہا کہ نبی کریم صلی اللہ علیہ وسلم کی بات کبھی غلط نہیں ہو سکتی، خط نکال ورنہ ہم تجھے ننگا کر دیں گے۔ جب اس نے ہمارا یہ سخت رویہ دیکھا تو ازار باندھنے کی جگہ کی طرف اپنا ہاتھ لے گئی وہ ایک چادر میں لپٹی ہوئی تھی اور اس نے خط نکال کر ہم کو دے دیا، ہم اسے لے کر نبی کریم صلی اللہ علیہ وسلم کی خدمت میں حاضر ہوئے۔ عمر رضی اللہ عنہ نے کہا کہ اس نے (یعنی حاطب بن ابی بلتعہ نے) اللہ اور اس کے رسول اور مسلمانوں سے دغا کی ہے، آپ مجھے اجازت دیں تاکہ میں اس کی گردن مار دوں، لیکن آپ صلی اللہ علیہ وسلم نے ان سے دریافت فرمایا کہ تم نے یہ کام کیوں کیا؟ حاطب رضی اللہ عنہ بولے: اللہ کی قسم! یہ وجہ ہرگز نہیں تھی کہ اللہ اور اس کے رسول پر میرا ایمان باقی نہیں رہا تھا، میرا مقصد تو صرف اتنا تھا کہ قریش پر اس طرح میرا ایک احسان ہو جائے اور اس کی وجہ سے وہ (مکہ میں باقی رہ جانے والے) میرے اہل و عیال کی حفاظت کریں۔ آپ کے اصحاب میں جتنے بھی حضرات (مہاجرین) ہیں، ان سب کا قبیلہ وہاں موجود ہے اور اللہ ان کے ذریعے ان کے اہل و مال کی حفاظت کرتا ہے۔ نبی کریم صلی اللہ علیہ وسلم نے فرمایا کہ انہوں نے سچی بات بتا دی ہے اور تم لوگوں کو چاہیے کہ ان کے متعلق اچھی بات ہی کہو۔ عمر رضی اللہ عنہ نے پھر عرض کیا کہ اس شخص نے اللہ، اس کے رسول اور مسلمانوں سے دغا کی ہے، آپ مجھے اجازت دیجئیے کہ میں اس کی گردن مار دوں۔ آپ صلی اللہ علیہ وسلم نے ان سے فرمایا کہ کیا یہ بدر والوں میں سے نہیں ہے؟ آپ صلی اللہ علیہ وسلم نے فرمایا کہ اللہ تعالیٰ اہل بدر کے حالات کو پہلے ہی سے جانتا تھا اور وہ خود فرما چکا ہے کہ ”تم جو چاہو کرو، تمہیں جنت ضرور ملے گی۔“ (یا آپ صلی اللہ علیہ وسلم نے یہ فرمایا کہ) میں نے تمہاری مغفرت کر دی ہے، یہ سن کر عمر رضی اللہ عنہ کی آنکھوں میں آنسو آ گئے اور عرض کیا، اللہ اور اس کے رسول کو زیادہ علم ہے۔ (صحیح بخاری، حدیث نمبر:3983)