سوال: السلام علیکم، مفتی صاحب! میری بیوی میری عزت نہیں کرتی۔ بعض اوقات بہت بد لہجے میں گفتگو کرتی ہے۔ جاہل جیسے الفاظوں کا بھی انتخاب کرتی ہے، ان سب سے میرا دل بہت دکھتا ہے۔ برائے مہربانی مجھے قرآن اور احادیث میں موجودہ ایسی وعیدیں بتا دیں تاکہ میں اپنی بیوی کو بھیج سکوں جس سے اس کی اصلاح ہو سکے۔ اس کو احساس ہو سکے کہ وہ کتنا غلط کر رہی ہے اور شوہر کی عزت کرنا اس پہ لازم ہے۔ اس کے علاوہ کیا ایسی بیوی کو طلاق کی دھمکی دینا جائز ہوگا؟ کہ اگر میری عزت نہیں کری تو میں چھوڑ بھی سکتا ہوں۔

جواب: شریعت مطہرہ نے جہاں ایک طرف شوہر کو بیوی کے ساتھ اچّھا رویّہ اپنانے کی ترغیب دی ہے تو دوسری طرف بیوی کو بھی شوہر کے تمام تر حقوق مکمل طور پر نبھانے کا حکم دیا ہے اور قابلِ اطاعت امور میں شوہر کی نافرمانی کو ناجائز قرار دیا ہے، چنانچہ رسول اللہ ﷺ کا شوہر کے حقوق کے بارے میں ارشادِ گرامی ہے:
ترجمہ: " اگر میں کسی کو کسی کے لیے سجدہ کا حکم دیتا تو عورت کو حکم دیتا کہ وہ اپنے خاوند کو سجدہ کرے، کیونکہ اللہ تعالیٰ نے عورت پر شوہر کا بڑا حق رکھا ہے۔ (سنن بیہقی، حدیث نمبر: 14704)
ایک دوسری حدیث میں ہے کہ آپ ﷺ سے دریافت کیا گیا کہ بہترین عورت کونسی ہے؟ تو آپ ﷺ نے ارشاد فرمایا: "جسے اس کا شوہر دیکھے تو خوش ہو جائے اور جب وہ اسے کسی چیز کا حکم دے تو اسے بجا لائے اور اس کے مال اور اپنی ذات کے اعتبار سےکوئی ایسا فعل نہ کرے جو اسے (یعنی شوہر کو ) ناپسند گزرے۔" (سنن نسائی، حدیث نمبر: 3231)
اسی طرح ایک اور حدیث مبارکہ میں ہے کہ حضرت انس رضی اللہ عنہ کہتے ہیں کہ رسول کریم ﷺ نے فرمایا: "جو عورت پانچ وقت کی نماز ادا کرے اور ماہ رمضان کے روزے رکھے اور اپنی شرمگاہ کی حفاظت کرے اور اپنے شوہر کی اطاعت کرے تو وہ جس دروازہ سے چاہے جنت میں داخل ہوجائے۔" (مشکوۃ، حدیث نمبر: 3254)
اس کے علاوہ بھی شوہر کی فرمانبرداری کے بارے میں بیشتر روایات موجود ہیں، ان سب کا حاصل یہ ہے کہ عورت پر شرعاً لازم ہے کہ وہ شوہر کی اطاعت کرے اور اس کی نافرمانی اور بے عزتی سے بچے۔
اسی طرح شوہر کو بھی چاہیے کہ وہ تحمّل اور بردباری سے کام لے، کیونکہ عورت میں کسی قدر کجی اور بدخلقی کا رہنا اس کی فطرت کا حصّہ ہے، چنانچہ رسول اللہ ﷺ نے فرمایا: "بلاشبہ عورت پسلی کی طرح ہے، اگر تم اسے سیدھا کرنے لگ جاؤ گے تو اسے توڑ ڈالو گے اور اگر اسے چھوڑ دو گے تو اس سے اس حال میں فائدہ اٹھاؤ گے کہ اس میں ٹیڑھا پن ہو گا۔" (صحیح مسلم، حدیث نمبر: 3650)
اس لیے شوہر کو چاہیے کہ وہ طلاق دینے میں جلدی سے کام نہ لے، بلکہ سورہ نساء آیت نمبر: 34 اور 35 کی قرآنی تعلیمات کے مطابق عمل کریں۔ ارشاد باری تعالیٰ ہے:
ترجمہ : "مرد عورتوں کے نگران ہیں، کیونکہ اللہ نے ان میں سے ایک کو دوسرے پر فضیلت دی ہے اور کیونکہ مردوں نے اپنے مال خرچ کیے ہیں۔ چنانچہ نیک عورتیں فرمانبردار ہوتی ہیں، مرد کی غیر موجودگی میں اللہ کی دی ہوئی حفاظت سے (اس کے حقوق کی) حفاظت کرتی ہیں۔ اور جن عورتوں سے تمہیں سرکشی کا اندیشہ ہو تو (پہلے) انہیں سمجھاؤ، اور (اگر اس سے کام نہ چلے تو) انہیں خواب گاہوں میں تنہا چھوڑ دو ، (اور اس سے بھی اصلاح نہ ہو تو) انہیں مار سکتے ہو۔ پھر اگر وہ تمہاری بات مان لیں تو ان کے خلاف کاروائی کا کوئی راستہ تلاش نہ کرو۔ یقین رکھو کہ اللہ سب کے اوپر، سب سے بڑا ہے۔ (34) اور اگر تمہیں میاں بیوی کے درمیان پھوٹ پڑنے کا اندیشہ ہو تو (ان کے درمیان فیصلہ کرانے کے لیے) ایک منصف مرد کے خاندان میں سے اور ایک منصف عورت کے خاندان میں سے بھیج دو ۔ اگر وہ دونوں اصلاح کرانا چاہیں گے تو اللہ دونوں کے درمیان اتفاق پیدا فرما دے گا۔ بیشک اللہ کو ہر بات کا علم اور ہر بات کی خبر ہے۔ (35)

ان تمام کوششوں کے باوجود بھی اگر عورت کی اصلاح نہیں ہوتی اور آپس میں حدود اللہ کی رعایت دشوار ہو تو ایسی صورت میں شوہر کو چاہیے کہ بیوی کو صرف ایک طلاق دے، تاکہ اگر بعد میں ندامت ہو تو میاں بیوی رجوع کرسکیں۔