سوال: 1991 میں والد اور والدہ دونوں کی موجودگی میں پانچ بھائی اور آٹھ بہنوں میں سے ایک بھائی نے کہا کہ مجھے الگ کرو اور اس طرح الگ کرو کہ پھر میرا باپ کی وراثت سے کوئی سروکار نہیں ہوگا۔ چنانچہ باپ کی موجودگی میں کل اثاثہ پراپرٹی نقدی سمیت 28 لاکھ بنا۔
اس ایک بھائی کو الگ کرنے کے لیے 28 لاکھ کی تقسیم باپ کی موجودگی میں ان کی رضامندی سے بڑے بھائیوں نے اس طرح کی کہ چار چار لاکھ روپوں کے پانچوں بھائیوں کے حصے بنا دیے۔ الگ ہونے والے بھائی کو چار لاکھ روپے دے کر الگ کر دیا، باقی بھائیوں کے نام لگا دیے لیکن ان کا حصہ ان کو دیا نہیں ۔ یہ کل 20 لاکھ روپے ہوئے باقی آٹھ لاکھ روپے میں سے چار لاکھ والدین کے لیے اور چار لاکھ کنوارے بہن بھائیوں کی شادی کے لیے رکھ دیے، چار لاکھ تو الگ ہونے والے بھائی کو دے دیے تھے۔ بقیہ 24 لاکھ روپے سے والد کا کاروبار جو چل رہا تھا وہ اسی طرح چلتا رہا لیکن محنت بڑے بیٹوں نے کی۔
18 جون 1995 میں والد صاحب کا انتقال ہوا۔ 1997 میں کنوارے بہن بھائیوں کی شادی ہو گئی۔ مارچ 2001 میں باقی چار بھائیوں نے الگ ہونے کے لیے کل پراپرٹی نقدی کا حساب لگایا جو کہ ایک کروڑ روپے بنا۔
جواب طلب امور یہ ہیں:
1) باپ کی موجودگی اور رضامندی والی اس تقسیم کا کیا حکم ہے؟
2) 1991 میں جو تقسیم باپ کی موجودگی میں ہوئی اور 2001 میں جو تقسیم بھائیوں نے کی ان دونوں تقسیموں کے وقت بہنوں کا کوئی حصہ نہیں نکالا گیا اب بہنوں کو کیسے حصہ دیں گے موجودہ اثاثے اور قیمت کے مطابق یا پہلے والے اثاثے اور قیمت کے مطابق حصہ دیں گے؟
3) باپ کی وفات کے بعد جو کاروبار بڑھا بڑے بھائیوں کی محنت کی وجہ سے وہ بھی میراث کا حصہ ہوگا یا نہیں اور اس بڑھنے والے اثاثے کو کیسے الگ کریں گے؟
4) کیا بڑے بھائیوں کو یہ حق پہنچتا ہے کہ وہ کاروبار میں زیادہ محنت کی وجہ سے اپنے باپ کی میراث میں سے یا باپ کی وفات پا جانے کے بعد بڑھنے والے اثاثے میں سے زیادہ حصہ لیں؟
5) اب اگر شرعی اصولوں کے مطابق تقسیم کریں تو موجودہ اثاثوں اور ان کی قیمتوں کے مطابق کریں گے یا پہلے والے اثاثوں اور ان کی قیمتوں کے مطابق تقسیم کریں گے؟
نوٹ:اس بھائی کو نکال کر ورثاء میں اب چار بھائی، آٹھ بہنیں اور ایک بیوہ ہیں۔

جواب: 1) پوچھی گئی صورت میں چونکہ والد صاحب کے کہنے پر چاروں بیٹوں نے آپس میں صرف زبانی تقسیم کی تھی جو کہ غیر منصفانہ تھی اور مزید یہ کہ کسی کو بھی اس وقت ملکیتاً قبضہ و تصرف نہیں دیا گیا تھا (جیسا کہ سوال سے ظاہر ہے باقی بھائیوں کے نام لگا دیے لیکن ان کا حصہ ان کو دیا نہیں) اس لیے بیٹوں کی کی گئی تقسیم نافذ نہیں ہوئی، لہذا والد کی تمام چیزیں ان کے شرعی ورثاء (بیوی، بیٹے اور بیٹیوں) میں شریعت کے حصوں کے مطابق تقسیم ہوں گی۔
2،3) والد کے انتقال کے بعد ان کے کاروبار میں جو اضافہ ہوا ہے، وہ سب والد کی ہی ملکیت شمار ہوگا، البتہ جن بھائیوں نے کاروبار کو بڑھانے میں محنت کی ہے، وہ اپنے حصہ کے علاوہ اجرتِ مثل لے سکتے ہیں۔
4) وراثت کئی سال بعد تقسیم جارہی ہے تو موجودہ قیمت کے مطابق تقسیم کی جائے گی۔
5) واضح رہے کہ والد کی زندگی میں حصہ مانگنے والے بیٹے کو والد صاحب نے جو چار لاکھ روپے دیے ہیں، وہ والد صاحب کی طرف سے ہبہ (Gift) شمار کیا جائے گا اور یہ میراث کا بدل نہیں ہے، کیونکہ میراث مورث کے مرنے کے بعد تقسیم ہوتی ہے اور زندگی میں جو دیا جائے وہ ہبہ (Gift) کہلاتا ہے، لہذا اس بیٹے کو بھی والد صاحب کے انتقال کے بعد ان کی میراث میں سے حصہ ملے گا، البتہ اس بیٹے کو چاہیے کہ اپنا وعدہ پورا کرے اور ترکہ میں سے تھوڑا مال لے کر اپنے باقی حصے سے دیگر ورثاء کے حق میں دستبردار ہوجائے۔
اس کے علاوہ مرحوم کے ورثاء (بیوی، پانچوں بیٹوں اور آٹھ بیٹیوں) میں میراث کی تقسیم یوں ہوگی:
مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد کو ایک سو چوالیس (144) حصوں میں تقسیم کیا جائے گا، جس میں سے بیوہ کو اٹھارہ (18)، پانچوں بیٹوں میں سے ہر ایک بیٹے کو چودہ (14) اور آٹھوں بیٹیوں میں سے ہر ایک بیٹی کو سات (7) حصے ملیں گے۔
فیصد کے اعتبار سے بیوہ کو %12.5 فیصد حصہ، پانچوں بیٹوں میں سے ہر ایک بیٹے کو %9.72 فیصد حصہ اور آٹھوں بیٹیوں میں سے ہر ایک بیٹی کو %4.86 فیصد حصہ ملے گا۔