سوال: حضرت ! ایک اہم بات کی معلومات کرنا چاہتا ہوں، وہ یہ ایک مولانا صاحب فرما رہے تھے کہ "حضرت یوسف علیہ السلام کا (معاذ اللہ) منہ مبارک کالا کر کے گدھے پر بٹھا کر گلیوں کے چکر لگوائے گئے تھے، کیا یہ بات صحیح ہے؟ جبکہ دوسرے عالم کا کہنا ہے کہ ایسا کہنا گناہ ہے، اس بارے میں بتا دیں کہ کس عالم کی بات صحیح ہے؟ اللہ ہم سب کو معاف فرمائے۔ آمین

جواب: واضح رہے کہ قرآن کریم میں اللہ تعالى نے حضرت یوسف علیہ السلام کے قصے کو "احسن القصص" (سب سے بہترین قصہ) فرمایا ہےاور اس قصے کو بنسبت دیگر انبیاء کرام کے واقعات کے بہت تفصیل سے بیان فرمایا ہے، گویا کہ اللہ تعالى نے خود ہى اس قصے کى ضرورى تفصیلات بیان فرما دى ہیں، بلکہ بعض مقامات میں تو جزوى اور ضمنى تفصیلات بھى بیان فرما دى ہیں۔ رہا یہ واقعہ کہ حضرت یوسف علیہ السلام کو "گدھے پر بٹھا کر منہ کالا کر کے شہرکا چکر لگوا کر منادى کروائى گئى"، بعض تفاسیر میں اگرچہ اس قصہ کو ذکر کیا گیا ہے، لیکن وہ کسى مستند روایت کے حوالے سے مذکور نہیں ہے، نیز اس قصے میں منہ کالا کرنے کا ذکر بھی نہیں ہے، لہذا جب یہ واقعہ کسى معتبر ومستند روایت سے ثابت نہیں ہے تو اس کو بیان کرنے سے گریز کرنا چاہیے، کیونکہ نادانستہ طور پر اس سے ایک برگزیدہ نبى کى شان اقدس کى بے توقیرى اورتوہین کا پہلو نظر آتا ہے۔