سوال: مفتی صاحب ! سوال یہ ہے کہ جس شخص کو یہ بھی نہ پتہ ہو کہ اس کے ذمہ کتنی نمازیں قضاء ہیں، تو ایسی صورت میں وہ اپنی قضا نمازیں کیسے ادا کرے؟
کیا نوافل ادا کرنے سے بہتر یہ ہے کہ ہر نماز کے آخر میں قضا نمازیں ادا کرلی جائیں؟
کیا قضا نماز عصر کی نماز کے بعد پڑھ سکتے ہیں؟

جواب: ١) اگر کسی شخص کی نمازیں قضاء ہوگئی ہوں اور ان قضاء نمازوں کی تعداد یاد نہ ہو تو خوب اچھی طرح سوچ سمجھ کر ایک صحیح تخمینہ اور اندازا لگالینا چاہیے اور اس کے مطابق اپنی فوت شدہ نمازیں ادا کرلینی چاہییں، یہاں تک کہ اس کو یقین ہوجائے کہ اب میرے ذمہ کوئی قضاء نماز باقی نہیں ہے، مثلاً ایک شخص چودہ یا پندرہ سال کی عمر میں بالغ ہوا، اور اس نے پانچ چھ سال تک نماز نہیں پڑھی، یا کبھی پڑھی اور کبھی نہیں پڑھی اور یہ مدت اس شخص کے غالب گمان میں مثلاً پانچ سال کی ہوئی ، تو اس شخص کو اپنے غالب گمان کے مطابق اتنے ہی سالوں کی نماز ادا کرنا ضروری ہوگا۔
٢) اگرچہ قضاء نماز کا ادا کرنا نوافل کی ادائیگی سے افضل ہے، لیکن یہ حکم عام نوافل کے بارے میں ہے اور جہاں تک سنت موکدہ کی بات ہے، ان کو قضاء نمازوں کی وجہ سے چھوڑنا درست نہیں ہے۔
3) عصر کی نماز کے بعد سورج کے زردی کی طرف مائل ہونے سے پہلے تک قضاء نماز پڑھ سکتے ہیں، سورج کے زردی کی طرف مائل ہوجانے کے بعد سے لے کر غروب آفتاب تک، اس دن کی عصر کی نماز کے علاوہ باقی کوئی نماز ( قضاء، نفل، وغیرہ) ادا نہیں کرسکتے۔