سوال: میں نے سنا ہے کہ مسلم شریف میں حدیث ہے، جس میں مردوں کو زرد رنگ پہننے سے منع کیا گیا ہے، اس کی تصدیق فرمادیں۔

جواب: جی ہاں ! مسلم شریف میں یہ حدیث ان الفاظ کے ساتھ موجود ہے:
حَدَّثَنَا مُحَمَّدُ بْنُ الْمُثَنَّى حَدَّثَنَا مُعَاذُ بْنُ هِشَامٍ حَدَّثَنِي أَبِي عَنْ يَحْيَى حَدَّثَنِي مُحَمَّدُ بْنُ إِبْرَاهِيمَ بْنِ الْحَارِثِ أَنَّ ابْنَ مَعْدَانَ أَخْبَرَهُ أَنَّ جُبَيْرَ بْنَ نُفَيْرٍ أَخْبَرَهُ أَنَّ عَبْدَ اللَّهِ بْنَ عَمْرِو بْنِ الْعَاصِ أَخْبَرَهُ قَالَ رَأَى رَسُولُ اللَّهِ صَلَّى اللَّهُ عَلَيْهِ وَسَلَّمَ عَلَيَّ ثَوْبَيْنِ مُعَصْفَرَيْنِ فَقَالَ إِنَّ هَذِهِ مِنْ ثِيَابِ
الْكُفَّارِ فَلَا تَلْبَسْهَا.
(کتاب اللباس والزینۃ، باب النھی عن لبس الرجل الثوب المعصفر، رقم الحدیث 5429)
ترجمہ:
حضرت عبد اللہ بن عمرو بن عاص رضی اللہ تعالیٰ عنہما نے انھیں بتایا کہ رسول اللہ صلی اللہ علیہ وسلم نے مجھے عصفر سے رنگے ہوئے دو کپڑے پہنے ہوئے دیکھا تو آپ نے فرمایا : یہ کافروں کے کپڑے ہیں تم انھیں مت پہنو۔
واضح رہے کہ مذکورہ حدیث میں "عصفر یا زعفران" سے رنگے ہوئے کپڑوں کی ممانعت مردوں کے لیے ثابت ہے، "عصفر یا زعفران" کی تشریح میں بعض علماء کا قول یہ ہے کہ یہ ایک سرخ پودا ہوتا ہے، جبکہ بعض علماء فرماتے ہیں کہ یہ زرد رنگ کی بوٹی ہے۔
واضح رہے کہ "عصفر اور زعفران" سے رنگا ہوا کپڑا مردوں کے لیے استعمال کرنا جائز نہیں، البتہ اگر کوئی رنگ بعینہ "عصفر "یا "زعفران" کے رنگ جیسا ہو، مگر خود "عصفر یا زعفران" نہ ہو، تو اس کا استعمال جائز ہے، بشرطیکہ ایسے رنگوں کے کپڑے اس علاقے کی خواتین کے ساتھ خاص نہ ہوں۔