سوال: میرے شوہر جاوید اقبال کا انتقال ہو گیا ہے، اس کے ٹوٹل چھ بھائی اور چار بہنیں تھیں۔ ایک بھائی اور ایک بہن کا انتقال ان کے والد کی زندگی میں ہو گیا تھا، میرے شوہر کا انتقال میرے سسر کی وفات کے بعد ہوا، میرے بچے نہیں ہیں، ان کے والد کے دو مکان ایک شاہ فیصل کالونی میں مکان نمبر 3/106 اور ایک مکان سعدی ٹاؤن بلاک 4 میں 250 گز پر ہے، اس کے علاوہ مجھے ان کی جائیداد کا کوئی علم نہیں، میرے شوہر کی زندگی میں ان کے بھائی مکان خالی کروانے آئے جس کی وجہ سے بہت لڑائیاں ہوئیں تو میرے شوہر نے کورٹ میں مقدمہ درج کیا اور ان کا اسی دوران انتقال ہو گیا، آپ مجھے یہ بتا دیں کہ میرا کتنا حق بنے گا، میرے بچے بھی نہیں اور شوہر بھی اس دنیا سے چلے گئے، ان کے چار بھائی اور تین بہنیں ہیں، ایک ان کے والد کی دکان جو پگڑی پر ہے وہ شاہ فیصل میں ہے اب اپ میرے حق میں جو فیصلہ ہے وہ بتا دیں۔ابھی ان کے چار بھائی اور تین بہنیں ہیں، جس میں وراثت تقسیم ہوگی وہ دو مکان ہیں، ایک سعدی ٹاؤن میں ڈھائی سو گز پر ہے اور دوسرا شاہ فیصل کالونی میں 3 نمبر پر 80 گز پر ہے۔رہنمائی فرمائیں۔

جواب: مرحوم کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی(1/3) میں وصیت نافذ کرنے کے بعد کل جائیداد منقولہ و غیر منقولہ کو (286) دو سو چھیاسی حصوں میں تقسیم کیا جائے گا، جس میں سے جاوید اقبال کے چاروں بھائیوں میں سے ہر ایک کو (50) پچاس حصے، تینوں بہنوں میں سے ہر ایک کو (25) پچیس حصے اور جاوید اقبال کی اہلیہ (آپ) کو (11) گیارہ حصے ملیں گے۔
اگر فیصد کے اعتبار سے تقسیم کریں تو جاوید اقبال کے چاروں بھائیوں میں سے ہر ایک بھائی کو %17.48 فیصد، ہر ایک بہن کو %8.74 فیصد اور جاوید اقبال کی اہلیہ (آپ) کو %3.84 فیصد حصہ ملے گا۔
واضح رہے کہ مروّجہ پگڑی نہ تو مکمل طور پر خرید فروخت ہے اور نہ ہی کرایہ داری (اجارہ) کا معاملہ ہے، بلکہ یہ دونوں کے درمیان ملا جلا معاملہ ہے، اس لئے شرعی طور پر مروّجہ پگڑی کا معاملہ درست نہیں ہے، نیز اس معاملہ کے نتیجے میں پگڑی پر دی گئی دکان میں ملکیت مکمل طور پر منتقل نہیں ہوتی، بلکہ اصل مالک کی ملکیت اس دکان پر برقرار رہتی ہے، اور پگڑی کی مد میں دی جانے والی رقم پگڑی پر لینے والے شخص کی ملکیت میں ہوتی ہے، اب اگر پگڑی پر دکان لینے والے شخص کا انتقال ہوجائے تو یہ دکان اس کے ورثہ میں تقسیم نہیں ہوگی، البتہ پگڑی کی مد میں جو رقم جمع کرائی گئی تھی، وہ اس کے شرعی ورثاء کے درمیان درج بالا میراث کے شرعی اصولوں کے مطابق تقسیم ہوگی۔