سوال: کیا ہمارے پالتو جانور بھی جنت میں ہمارے ساتھ ہوں گے؟نیز یہ بتادیں کہ کیا اصحابِ کہف کا کتا اور موسی علیہ السلام کی گائے جنت میں جائے گی؟

جواب: واضح رہے کہ جنت مؤمن کا وہ من پسند ٹھکانہ ہے، جہاں اللّٰہ تعالیٰ اس کی ہر خواہش کو پورا فرمائیں گے، ارشاد باری تعالیٰ ہے:"اور اس جنت میں ہر وہ چیز ہوگی جس کی دلوں کو خواہش ہوگی اور جس سے آنکھوں کو لذت حاصل ہوگی۔ (ان سے کہا جائے گا کہ) اس جنت میں تم ہمیشہ رہو گے"۔(سورۃ الزخرف: آیت نمبر: 71)
لہذا بلاشبہ یہ ممکن ہے کہ اللہ تعالی جنت والوں کے اعزاز میں ان کی خواہشات نفس کے مطابق جنت میں مختلف قسم کے جانوروں کو پیدا فرما دیں۔ ظاہر ہے کہ وہ جانور دنیا کے جانوروں کے ناموں کے مشابہ تو ہوں لیکن اوصاف اور کمالات میں وہ جنت کی نعمتوں سے مالا مال ہوں گے۔
تاہم یہ بات کہ دنیا کے جانوروں میں سے کونسے جانور جنت میں داخل ہوں گے؟ اس بارے میں صرف بکری سے متعلق حدیث میں ذکر آیا ہے۔
حضرت عبداللہ بن عمر رضی اللہ عنہما سے مروی ہے وہ فرماتے ہیں کہ رسول اللہ صلی اللہ علیہ وسلم نے ارشاد فرمایا: "بکری جنت کے جانوروں میں سے ہے"۔ (سنن ابن ماجه: حدیث نمبر: 2306)
باقی بعض جانوروں کے متعلق جو لوگوں میں مشہور ہے کہ وہ جنت میں داخل ہوں گے، مثلاً:
1۔ حضرت محمد صلی اللہ علیہ وسلم کی اونٹنی۔
2۔ حضرت صالح علیہ السلام کی اونٹنی۔
3۔ حضرت ابراہیم علیہ السلام کا بچھڑا۔
4۔ حضرت اسماعیل علیہ السلام کا مینڈھا۔
5۔ حضرت موسی علیہ السلام کی گائے۔
6۔ حضرت یونس علیہ السلام کی مچھلی۔
7۔ حضرت عزیز علیہ السلام کا گدھا.
8۔ حضرت سلیمان علیہ السلام کی چیونٹی۔
9۔ حضرت سلیمان علیہ السلام کا ہد ہد۔
10۔ اصحاب کہف کا کتا۔
ان جانوروں کا کسی معتبر روایت میں ذکر نہیں ملتا ہے، لہذا تعیین کے ساتھ ان جانوروں کے جنت میں داخل ہونے کے متعلق نہیں کہا جاسکتا ہے۔