سوال: السلام علیکم! اگر کوئی عورت اپنے شوہر کے ساتھ نہیں رہنا چاہتی، جبکہ شوہر ساتھ رہنا چاہتا ہے اور حقوق زوجیت بھی ادا کرنا نہیں چاہتی، شوہر ملک سے باہر ہے اور بیوی کہتی ہے کہ پاکستان میں ہی رہونگی اور چھ مہینے میں ایک بار آ جایا کروں گی، بس میرا نان نفقہ بھجواتے رہو تو کیا شوہر پر نان نفقہ دینا لازم ہے؟
اور شوہر کو اکیلے اس طرح رہنے سے بھٹکنے کا خطرہ ہے تو کیا اگر عورت مستقل ساتھ رہنے پر نہ مانے تو اس کو طلاق دے کے دوبارہ نکاح سے گناہ تو نہیں ہوگا؟ اور نان نفقہ جب کہ اولاد کوئی نہیں ہے کتنا ہوگا؟ شریعت کے حساب سے بتا دیں۔

جواب: شریعت کا عام اصول ہے کہ جب کوئی معاملہ دو یا دو سے زیادہ لوگوں کے درمیان مشترک ہو تو اس میں ہر فریق پر کچھ ذمہ داریاں عائد ہوتی ہیں، مثلاً ماں باپ کے حقوق اولاد پر اور اولاد کے ماں باپ پر، مہمان کے میزبان پر اور میزبان کے مہمان پر، رعایا کے بادشاہ پر اور بادشاہ کے رعایا پر وغیرہ وغیرہ، اس قاعدے کی روشنی میں آپ کے لیے بات سمجھنا آسان ہو جائے گی کہ شریعت میں میاں بیوی کے ایک دوسرے پر بہت سے حقوق واجب ہیں، عام طور پر لوگ شوہروں کے حقوق کا تذکرہ تو کرتے ہیں لیکن شوہر کے ذمہ بیویوں کے حقوق کا نہ نام لیتے ہیں اور نہ ہی خیال رکھتے ہیں حالانکہ یہ زیادتی ہے کیونکہ معاملہ یکطرفہ نہیں بلکہ دو طرفہ ہے۔
شریعت نے شوہر کے ذمے بھی بیوی کے متعدد حقوق عائد کئے ہیں، منجملہ ان حقوق کے ایک اہم حق یہ بھی ہے کہ عورت کو اپنے والدین اور محارم سے ملنے کی اجازت دی گئی ہے، شادی شدہ عورت کو والدین سے ملاقات کے لیے ہفتہ میں ایک مرتبہ اور دیگر محارم سے ملاقات کے لیے سال میں ایک دفعہ جانے کا حق حاصل ہے، اور شوہر کو اس سے منع کرنے کا اختیار بھی نہیں ہے، چونکہ بیوی کو دوسرے ملک منتقل کرنے میں اس کے مذکورہ بالا حقوق تلف ہورہے ہیں، اس لیے عورت جب تک خود اپنے ان حقوق سے دستبردار نہ ہو، شوہر اس کو ملک سے باہر لے جانے پر مجبور نہیں کرسکتا، نیز شریعت میں عورت کے حق کی وجہ سے مرد کے لیے چار ماہ سے زائد سفر پر رہنا بدون بیوی کی اجازت کے جائز نہیں ہے۔
اسی طرح متاخرین فقہاءِ احناف نے فسادِ زمانہ کی بنا پر عورت کو شوہر کے ساتھ سفر پر مجبور نہ کرنے کا فتویٰ دیا ہے، اور ہمارے زمانے میں بعض وجوہ سے یہ فساد مزید بڑھ گیا ہے، اس لیے بیوی کو شرعاً یہ اختیار حاصل ہے کہ وہ شوہر کے ساتھ دوسرے ملک منتقل ہونے سے انکار کردے، اگر خاتون اپنے آبائی وطن میں رہنا چاہتی ہو تو شوہر اس معاملہ میں بیوی کے ساتھ زبردستی نہیں کرسکتا، اور ایسا کرنے سے خاتون ناشزہ (نافرمان) شمار نہیں ہوگی، بشرطیکہ وہ اپنے شہر میں شوہر کے ساتھ اس کے گھر میں رہنے پر راضی ہو۔
ان تمہیدی باتوں کے بعد آپ کے پوچھے گئے سوالات کا جواب یہ ہے کہ آپ اپنی بیوی کو بیرون منتقل ہونے پر مجبور نہیں کرسکتے ہیں اور آپ پر بدستور اپنی مذکورہ بیوی کے کھانے پینے، لباس اور رہائش کے جملہ اخراجات ادا کرنا لازم ہیں، خرچہ دینے میں آپ میاں بیوی کی مالی حیثیت کا اعتبار ہوگا جو عرف کے مطابق ہوگا، اگر آپ دونوں صاحب حیثیت ہیں تو امیروں والا خرچہ دینا ہوگا اور اگر دونوں غریب ہیں تو غریبوں والا، لیکن اگر ایک غریب ہے اور دوسرا امیر ہو تو اس صورت میں درمیانے درجے کا خرچہ دینا ہوگا۔
اسی طرح بغیر شرعی عذر کے طلاق دینا بیوی کے ساتھ ظلم اور زیادتی ہے جو کہ ناجائز ہے، اس لیے مذکورہ انکار کو بنیاد بنا کر بیوی کو طلاق نہ دیں، البتہ اگر آپ ایک سے زائد بیویوں کے حقوقِ واجبہ میں مساوات کرسکتے ہیں تو اپنی حاجت کو مدنظر رکھتے ہوئے دوسری شادی کرسکتے ہیں۔