سوال: السلام علیکم، مفتی صاحب! ایک مسئلے سے متعلق رہنمائی درکار ہے۔
1) 2007 میں ہمارے والد محترم کا انتقال ہوا، ہم پانچ بہن بھائی (یعنی ایک بھائی اور چار بہنیں) ہیں، والد صاحب نے ترکے میں ایک مکان چھوڑا ہے جس کی مالیت آج کے موجودہ وقت کے اعتبار سے اندازاً 30 لاکھ ہوگی (اور اُس وقت کے اعتبار سے شاید بہت کم ہوگی)، جس میں ہمارا بھائی تا حال رہائش پذیر ہے، بھائی نے بہنوں سے رضامندی پوچھے بغیر اپنی مرضی سے 2015 میں اس گھر کو مسمار کرکے اسی زمین پر تعمیر وغیرہ کی جس سے آج اس کی مالیت اندازاً 60 لاکھ ہوگئی ہے، اب ہم پوچھنا یہ چاہتے ہیں کہ میراث کی تقسیم میں صرف زمین کا حساب لگایا جائے گا یا مکمل عمارت کا؟
2) عمارت میں 2007 کی عمارت کا اعتبار کر کے میراث تقسیم کی جائے گی یا آج کی موجودہ قیمت کا اعتبار ہوگا؟

3) پہلے بھائی کی مالی حالت ٹھیک نہ تھی، البتہ اس گھر میں وہ رہائش پذیر تھا۔ بہنوں نے اٹھارہ سال بعد میراث میں حصے کا تقاضا کیا ہے۔ ہمارا بھائی ہمیں میراث دینے پر راضی ہے، البتہ اس کا کہنا یہ ہے کہ پرانی تعمیر تو میں نے ختم کردی، نئی تعمیر پر میری ذاتی رقم لگی ہے۔ لہذا زمین کی قیمت کے اعتبار سے حصہ بنے گا اور اس میں سے بھی مکمل ہر ایک بہن کو شرعی حصہ نہیں دے سکتا، میرے پاس جو رقم ہے وہ لے لیں باقی معاف کر دیں، اور ہم بہنیں اس کو قبول کر لیں تو اس میں شرعی اعتبار سے کوئی حرج تو نہیں؟
4) اگر ہم میں سے کوئی بہن یہ کہے کہ مجھے مکمل حصہ درکار ہے، اور بھائی اسے رشتے کی نزاکت کا جذباتی بیان دیتے ہوئے اپنی مجبوری (بقول اس کے) بتاتے ہوئے گزارش کرے اور کہے کہ میری زندگی بہت کم رہ گئی ہے بیمار رہتا ہوں مجھے ذہنی تناؤ ہوگا تو بہن مجبوراً وہ رقم تسلیم کر سکتی ہے کہ اس کا رشتہ بحال رہے؟
5) ان تمام باتوں کو مد نظر رکھتے ہوئے ہم میں سے ہر ایک بہن کو شرعی اعتبار سے اس میں کتنا حصہ ملے گا؟

جواب: 1) مشترکہ زمین میں تعمیر کرنے والے بھائی کو تعمیر پر لگائی ہوئی رقم ملے گی یا نہیں؟ اس میں درج ذیل تفصیل ہے:
الف) اگر اس بھائی نے دیگر شریک ورثاء کی اجازت سے قرض، شراکت داری یا کسی قسم کی ملکیت کی صراحت کے ساتھ اپنے لیے تعمیرات کروائی ہو تو اس صورت میں جتنی رقم اور اخراجات مکان کی تعمیرات میں کیے تھے، وہ اس بھائی کو ملیں گے۔
ب) اور اگر اس بھائی نے تمام ورثاء کی اجازت لیے بغیر سب کے لیے یہ تعمیرات کروائی تھی تو اس صورت میں تعمیر میں لگائی گئی یہ رقم اور اخراجات اس بھائی کی طرف سے تبرع و احسان ہوں گے اور اس کو تعمیرات پر لگائی ہوئی رقم اور اخراجات نہیں ملیں گے۔
ج) اگر یہ تعمیرات ورثاء کی اجازت کے بغیر اس بھائی نے اپنے لیے کی تھی تو اس کو اپنی تعمیر کردہ عمارت کے بدلہ میں صرف اس عمارت کے ملبے کی قیمت ملے گی۔
نوٹ: اگر مشترکہ مکان میں تعمیر کرانے کا دوسرے شریک ورثاء کو معلوم تھا، اس کے باوجود انہوں نے منع نہیں کیا ہو تو ایسی صورت میں منع نہ کرنا اور خاموش رہنا رضامندی پر محمول ہوگا، اس صورت میں بھی تعمیرات پر لگائی ہوئی رقم ملے گی۔
2) چیزوں کی قیمت کا تعین موجودہ قیمت کے اعتبار سے لگایا جائے گا اگرچہ میراث کئی سالوں بعد تقسیم ہو رہی ہو۔
3/4) مورث کی وفات کے بعد جہاں تک کسی وارث کا اپنے حصہ سے دستبرداری اختیار کرنے یا اپنا حق معاف کرنے کا تعلق ہے تو چونکہ وہ شخص مال میراث میں اپنے حصہ کا حقدار بن چکا ہوتا ہے، اس لئے اگر وہ اپنے حق سے دستبردار ہونا چاہے تو شرعاً اس کی اجازت ہے، البتہ ایسے موقع پر ہمارے معاشرے میں بالخصوص بہنوں کو بہت سے علاقوں میں میراث سے حصہ نہیں دیا جاتا، اور بہنیں بھی بادل ناخواستہ اپنا حق معاف کرنے کا اظہار کردیتی ہیں یا ان سے معاف کروایا جاتا ہے، (جیسا کہ سوال میں ہے) لہذا ایسے موقع پر ان کی دلی رضامندی (طیبِ نفس) کا معلوم کرنا مشکل ہے، اس لئے ایسے موقع پر ضروری ہے کہ بہنوں کو ان کا حصہ ان کے قبضہ میں دیدیا جائے، اس کے بعد اگر وہ اپنی خوشدلی سے واپس کرنا چاہیں تو کرسکتی ہیں۔
5) مرحوم والدین کی تجہیز و تکفین کے جائز اور متوسط اخراجات، قرض کی ادائیگی اور اگر کسی غیر وارث کے لیے جائز وصیت کی ہو تو ایک تہائی (1/3) میں وصیت نافذ کرنے کے بعد کل جائیداد منقولہ و غیر منقولہ کو کل چھ (6) حصوں میں تقسیم کیا جائے گا، جس میں سے بیٹے کو دو (2) اور چاروں بیٹیوں میں سے ہر ایک بیٹی کو ایک (1) حصہ ملے گا۔
فیصد کے اعتبار سے بیٹے کو %33.33 فیصد حصہ اور چاروں بیٹیوں میں سے ہر ایک بیٹی کو %16.66 فیصد حصہ ملے گا۔