سوال: مفتی صاحب! میری ایک18 سال کی دوست ہے اور پری میڈیکل میں پڑھ رہی ہے۔، وہ پانچ وقت کی نمازی، پاکیزہ اور عملی مسلم لڑکی ہے، وہ اسلام کو بہت مضبوطی سے فالو کرتی ہے، یہاں تک کہ ہم کبھی کبھی اسے مزاح میں “کٹر مسلم” بھی کہہ دیتے ہیں، وہ ہر چیز میں اسلام کے بتائے ہوئے طریقوں کو اپناتی ہے اور اپنے میل کزنز سے بھی ضرورت کے بغیر بات نہیں کرتی۔
اس کا رشتہ بچپن میں اس کے کزن سے طے کیا گیا تھا، لیکن وہ لڑکا ٹھیک نہیں ہے، گھر والوں نے اسے ایک لڑکی کے ساتھ پکڑ بھی لیا تھا، وہ بہت بُرا انسان ہے، میں کیسے بیان کروں، وہ واقعی بہت خراب کردار کا ہے۔
مسئلہ یہ ہے کہ میری دوست گھر والوں کو یہ نہیں بتا سکتی کہ وہ اس لڑکے سے نکاح نہیں کرے گی، اس کا ایمان بھی اسے اجازت نہیں دیتا، لیکن اس کا یہ یقین ہے کہ اس کا رشتہ ٹوٹے گا نہیں اور اسی لڑکے سے اس کا نکاح ہوگا۔
وہ بار بار مجھ سے پوچھتی ہے کہ اللہ نے قرآن میں فرمایا ہے کہ "نیک عورتوں کے لیے نیک مرد ہیں" تو پھر میرے ساتھ ایسا کیوں ہے؟ اور میرے پاس اس کا کوئی جواب نہیں ہے۔ براہ کرم! آپ رہنمائی فرمائیں۔ شکریہ
https://alikhlasonline.com/detail.aspx?id=7923

جواب: واضح رہے کہ والدین کو اپنے بچے اور بچیوں کا رشتہ ایسی جگہ کرنا چاہیے جو ان کے جوڑ کا ہو، اور جو دونوں (والدین اور بچے بچی) کے لیے عار کا باعث نہ ہو، لہذا آپ کی سہیلی کے گھر والوں کو چاہیے کہ اگر لڑکا واقعی برے کاموں میں ملوّث ہے اور اس نے ان غلط کاموں سے توبہ نہیں کی ہے یا آئندہ بھی اس کے صحیح ہونے کی توقّع نہیں ہے تو ایسے لڑکے کے ساتھ اپنی پاکدامن لڑکی کا رشتہ نہ کریں، کیونکہ اس سے نکاح کے بعد میاں بیوی کے درمیان الفت و محبت پیدا نہیں ہوسکے گی، بلکہ ایک دوسرے سے متعلق نفرت ہی رہے گی جو آگے چل کر لڑائی جھگڑے، ناچاقی اور طلاق کا باعث بن سکتی ہے۔
جہاں تک آپ کی سہیلی کے اشکال کی بات ہے کہ اللہ نے قرآن میں فرمایا ہے کہ "نیک عورتوں کے لیے نیک مرد ہیں" تو پھر میرے ساتھ ایسا کیوں ہے؟ تو واضح رہے کہ یہ قاعدہ کلیہ نہیں ہے، بلکہ ایک عام ضابطہ ہے کہ اللہ تعالیٰ نے انسانی طبیعتوں میں طبعی طور پر یہ جوڑ رکھا ہے کہ بدکار عورتیں بدکار مردوں کی طرف رغبت اور میلان رکھتی ہیں، اور بدکار مرد بدکار عورتوں کو پسند کرتے ہیں، اسی طرح پاکیزہ مرد اور پاکیزہ عورتوں کی طبیعت پاکیزہ مرد اور پاکیزہ عورتوں کی طرف ہی مائل ہوتی ہے، وہ کبھی بھی کسی بدکار عورت یا مرد کو اپنا شریک حیات نہیں چنتے۔
چنانچہ تفسیر مظہری میں قاضی ثناء اللہ صاحبؒ اس آیت کی تشریح میں رقمطراز ہیں:
"اور (یہ قاعدہ عام ہے کہ) گندی عورتیں گندے مردوں کے لائق ہوتی ہیں اور گندے مرد گندی عورتوں کے لائق اور ستھری عورتیں ستھرے مردوں کے لائق ہوتی ہیں اور ستھرے مرد ستھری عورتوں کے لائق۔
اکثر اہل تفسیر کے نزدیک الخبیثات سے مراد ہیں گندی باتیں، مذمت، تحقیر اور توہین کرنے والے ناپاک الفاظ ایسے الفاظ وکلمات گندے لوگوں کے لیے ہی زیبا ہیں ناپاک لوگوں کو ہی ایسی بری باتوں کا استحقاق ہے اور خبیث لوگ ہی مذمت و تحقیر وغیرہ کے اہل ہیں اور پاک کلمات یعنی تعریف، ثناء اور دعا کے مستحق پاک لوگ ہیں اور پاک کلمات انہی کے لیے زیبا ہیں۔" (تفسیر مظہری: سورۃ النور، الآیة:212/8 ،26، ط:دار الاشاعت)