سوال: مفتی صاحب ! شادی شدہ آدمی گھر سے ایک سال کیلے باہر جا سکتا ہے؟ اسکے بارے میں حدیث کی روشنی میں رہنمائی فرما دیں۔

جواب: اگر شادی کے بعد گھر سے دور رہنے میں بیوی کی عزت وناموس اور اس کی حفاظت کا انتظام نہ ہو، یا شوہر کے دور ہونے کی وجہ سے اس کے گناہ اور فتنہ میں  مبتلا ہونے کا اندیشہ ہو تو  ایسی صورت میں شوہر  کے لیے بیوی کو ایسی حالت میں تنہا چھوڑ کر کسی کام کی وجہ سے دور رہنا درست نہیں ہے، اور اگر یہ اندیشہ نہ ہو تو پھردور رہنا جائز ہے، لیکن اس صورت میں  بیوی کی رضامندی کے بغیر چار مہینہ سے زیادہ  گھر سے دور  رہنا جائز نہیں ہے، اس طرح بیوی کی اجازت کے بغیر گھر سے دور رہنے میں بیوی کی حق تلفی ہے۔
اور اگر بیوی خوشی سے اِجازت دیتی ہے، تو چار ماہ سے زائد بھی رہ سکتے ہیں۔
حضرت عمر رضی اللہ عنہ نے ایک مرتبہ حضرت حفصہ رضی اللہ عنہا سے پوچھا کہ عورت بغیر مرد کے کتنے دن صبر کرسکتی ہے؟
حضرت حفصہ رضی اللہ عنہا نے کہا: چار ماہ، تو حضرت عمر رضی اللہ عنہ نے فوج کے سپہ سالاروں کو حکم دیا کہ شادی شدہ فوجی اپنے گھر سے چار ماہ سے زیادہ باہر نہ رہیں۔