سوال: مسجد میں قرآن شریف رکھنے کا ایک خانہ بنا ہوا ہے، کیا اس کو پھلانگ کر صف میں شامل ہوا جاسکتا ہے ؟ جبکہ جماعت کھڑی ہو چکی ہے اور صف کے ساتھ کچھ جگہ چھوڑ کر ایک ساتھی سنتیں پڑھ رہے ہیں، سنت پڑھنے والے ساتھی کے پیچھے سے گزرنے کی جگہ نہیں ہے۔ رہنمائی فرمائیں کہ سنتیں پڑھنے والے کی نماز ختم کرنے کا انتظار کریں یا قرآن والی اس الماری کے اوپر سے پھلانگ کر جماعت میں شریک ہو جائیں۔ جزاک اللہ خیر

جواب: نمازی کے سامنے سے گزرنے کی فقہاء نے تین صورتیں لکھی ہیں:
۱۔ اگر نمازی کے لئے کسی اور جگہ نماز پڑھنے کی گنجائش نہ ہو، اور گزرنے والوں کے لئے دُوسری جگہ سے گزرنے کی گنجائش ہے، تو گزرنے والا گناہگار ہوگا۔
۲۔ دُوسری اس کے برعکس کہ نمازی کے لئے دُوسری جگہ گنجائش تھی، مگر گزرنے والے کے لئے اور کوئی راستہ نہیں، تو اس صورت میں نمازی گناہگار ہوگا۔
٣۔ دونوں کے لئے گنجائش ہو، نمازی کے لئے دُوسری جگہ نماز پڑھنے کی، اور گزرنے والے کے لئے کسی اور طرف سے نکلنے کی، اس صورت میں دونوں گناہگار ہوں گے، بہرحال اس میں نمازیوں کو بھی احتیاط کرنی چاہئے اور گزرنے والوں کو بھی۔
لہذا اس ساری تفصیل کے بعد صورتِ مسئولہ میں اگر کوئی اور جگہ نہ ہو، تو قرآن پاک کی ریک پر سے پھلانگنے کے بجائے نمازی کے سامنے سے گزرنے کی گنجائش ہوگی۔
واضح رہے کہ قرآن شریف کے اوپر سے پھلانگنا بہرصورت مکروہ ہے۔