سوال: السلام علیکم، جناب جیسا کہ آج کل شادیوں میں دین سے دوری اور فضول رسمیں رائج ہیں، آج کے حالت کو مد نظر رکھتے ہوئے، ان سے کیسے بچا جائے اور شادیوں میں سادگی کیسے لائیں؟
نکاح کی شرائط جو نکاح فارم میں درج ہوتی ہیں، اس میں طلاق کا حق بیوی کو تفویض کرنے سے متعلق کیا حکم ہے؟
حق مہر ادا کرنے سے متعلق سب سے اچھی صورت کیا ہے؟ براہ کرم ان تمام سوالات کے جوابات دیدیں۔

جواب: 1۔ نکاح ایک سنت عمل ہے اور شریعت نے نکاح کو سادہ اور آسان رکھا ہے، اس میں تکلفات، رسوم و رواج کو  ناپسند قرار دیا ہے۔ ان سے نکاح  کی سنت مشکل ہوجاتی ہے۔
شریعت نے شادی میں سادگی اپنانے، زائد اخرجات، جاہلانہ رسومات اورفضول خرچیوں سے اجتناب کرنے کا حکم دیا ہے اور یہی جناب رسول اللہﷺ اور صحابہ کرام رضوان اللہ علیہم کے طرز عمل سے واضح ہوتا ہے۔
حضرت عائشہ رضی اللہ عنہ سے روایت ہے:
عَنْ عَائِشَةَ، أَنَّ رَسُولَ اللهِ صَلَّى اللهُ عَلَيْهِ وَسَلَّمَ، قَالَ: " إِنَّ أَعْظَمَ النِّكَاحِ بَرَكَةً أَيْسَرُهُ مَؤُونَةً "(ج: 41، ص: 75، ط: موسسة الرسالة،بیروت۔ )
ترجمہ:
جوشادی جتنی سادگی اورکم اخرجات کےساتھ ہوگی وہ اتنی ہی زیادہ بابرکت ہوگی ۔
لہذا شادی میں سادگی کےلیے سنت نبویہ اور سلف صالحین کو نمونہ بنایا جائے، اور تمام رسومات، بےجاتکلفات، فضول  خرچی اور اسراف سے بچا جائے۔
2-شریعت میں طلاق دینے کا اصل اور مستقل اختیار مرد کو حاصل ہے، لیکن اگر مرد چاہے تو اپنا یہ اختیار بیوی کو یا کسی دوسرے شخص کو دے سکتا ہے ، اِس کو فقہی اصطلاح میں ’’ تفویضِ طلاق ‘‘ کہا جاتا ہے۔
نکاح فارم میں تفویض طلاق سے یہی مراد ہوتا ہے اور تفویضِ طلاق کے بعد عورت کو اپنا اختیار استعمال کرنے کی مدت شوہر کےالفاظ کے اعتبار سے مختلف ہوسکتی ہے۔
3-واضح رہے کہ مہر بیوی کا ایسا حق ہے کہ اس کی رضامندی کے بغیر معاف نہیں ہوسکتا ہے، اس کا ادا کرنا شوہر پر بہر صورت لازم اور ضروری ہے، حتی کہ مہر ادا کئے بغیر شوہر انتقال کر جائے تو تجہیز و تکفین کے بعد ترکہ کی تقسیم سے پہلے بیوی کا مہر ادا کیا جائے گا۔
اس لیے بہتر یہ ہے کہ بیوی سے پہلی ملاقات کے وقت مہر اس کے حوالہ کردیا جائے، البتہ مہر کی دو قسمیں ہوتی ہیں، ایک معجل اور دوسرا مؤجل۔

مہر معجل کی تعریف :
معجل سے مراد وہ مہر ہے جس کا نکاح کے بعد فوری طور پر ادا کرنا واجب ہوتا ہے۔
مہر معجل کا حکم:
بیوی کو نکاح کے فوری بعد مطالبہ کا پورا حق حاصل ہوتا ہے۔
مہر مؤجل کی تعریف :
مؤجل سے مراد یہ ہے جس کا نکاح کے بعد فوری طور پر ادا کرنا واجب نہ ہو، بلکہ اس کی ادائیگی کے لیے کوئی خاص مدت مقرر کی گئی ہو، خواہ مدت قریب ہو یا مدت بعید یا مدت سرے سے متعین نہ کی گئی ہو۔
مہرمؤجل کا حکم:
بیوی کو اس مقررہ وقت کے آنے سے پہلے اس مہر کے مطالبے کا حق نہیں ہوتا ہے۔
یاد رہے کہ مہر کا معجل یا مؤجل مقرر کرنا زوجین کی آپس کی رضامندی پر موقوف ہوتا ہے، چاہے سارا مہر معجل مقرر کیا جائے، چاہے سارا کا سارا مؤجل مقرر کیا جائے اور چاہے تو مہر کا کچھ حصہ معجل طے کیا جائے اور کچھ حصہ مؤجل طے کیا جائے،  یہ تمام صورتیں درست ہیں۔