سوال: السلام علیکم، مفتی صاحب ! پی ایس ایل کے میچز کے ٹکٹ پانچ سو میں خرید کر انہیں ہزار روپے میں کسی اور کو بیچنا اور دوسرے کا پانچ سو اضافی دے کر خریدنا کیسا ہے؟

جواب: ٹکٹ بلیک میں فروخت کرنا(سستے داموں لے کر آگے مہنگے دام فروخت کرنا ) فی نفسہ جائز ہے، کیونکہ اپنی ملکیت ہی کو اس نے بیچا ہے، البتہ اگر اسی ٹکٹ کو بلیک میں فروخت کرنا حکومت کے قانون  کی خلاف ورزی ہو، تواس صورت میں چونکہ اپنی عزت و آبرو کو خطرہ میں ڈالنا ہے، اس لئے شریعت ایسے کام کی اجازت نہیں دیتی۔
نیز واضح رہے کہ کرکٹ میچ یا دوسرے کھیل جب مستقل مقصد بنالیے جائیں، اور اس سے شرعی فرائض و واجبات میں کوتاہی ہونے لگے، اور خاص طور پر میچ کے دوران غیر شرعی کام بھی ہونے لگیں، جیسا کہ آج کل کے کھیلوں میں ان شرعی مفاسد کا ارتکاب کیا جانا معروف و مشاھد ہے، مثلاً: ناچ گانا، موسیقی، مردوں اور عورتوں کا مخلوط اجتماع اور بے پردگی ہونا، ان کھیلوں کا لازمی حصہ ہے، لہذا ان شرعی مفاسد کے ہوتے ہوئے میچ کے ٹکٹ فروخت کرنا اور اس کو با قاعدہ کاروبار بنانا درست نہیں ہے ۔