سوال: کیا یہ حدیث صحیح ہے کہ رسول اللہ صلی اللہ علیہ وسلم نے ارشاد فرمایا:آدمی کے گناہ گار ہونے کے لیے اتنا ہی کافی ہے کہ وہ اپنی لگی ہوئی روزی بلا وجہ چھوڑ دے۔

جواب: سوال میں ذکر کردہ حدیث کاعنوان اور ترجمہ غلط کیا گیا ہے، ذیل میں حدیث اور اس کا صحیح ترجمہ ذکر کیا جاتا ہے۔
حدثنا محمد بن كثير ، اخبرنا سفيان ، حدثنا ابو إسحاق ، عن وهب بن جابر الخيواني ، عن عبد الله بن عمرو ، قال : قال رسول الله صلى الله عليه وسلم : " كفى بالمرء إثما ان يضيع من يقوت " .(سنن ابی داود باب فِي صِلَةِ الرَّحِمِ، حدیث نمبر: 1692، مستدرک للحاکم ج1 ص 575،حدیث نمبر: 1515ط دارالکتب العلمیہ بیروت )
ترجمہ:
عبداللہ بن عمرو رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”آدمی کے گنہگار ہونے کے لیے کافی ہے کہ وہ ان لوگوں کو جن کے اخراجات کی ذمہ داری اس کے اوپر ہے، ضائع کر دے ۔
اسی مفہوم کی ایک اور حدیث صحیح مسلم میں بھی ہے۔
حدثنا سعيد بن محمد الجرمي ، حدثنا عبد الرحمن بن عبد الملك بن ابجر الكناني ، عن ابيه ، عن طلحة بن مصرف ، عن خيثمة ، قال:‏‏‏‏ كنا جلوسا مع عبد الله بن عمرو ، إذ جاءه قهرمان له، ‏‏‏‏‏‏فدخل، ‏‏‏‏‏‏فقال:‏‏‏‏ اعطيت الرقيق قوتهم، ‏‏‏‏‏‏قال:‏‏‏‏ لا، ‏‏‏‏‏‏قال:‏‏‏‏ فانطلق فاعطهم، ‏‏‏‏‏‏قال:‏‏‏‏ قال رسول الله صلى الله عليه وسلم:‏‏‏‏ " كفى بالمرء إثما ان يحبس عمن يملك قوته ".
(صحیح المسلم ،باب فَضْلِ النَّفَقَةِ عَلَى الْعِيَالِ وَالْمَمْلُوكِ وَإِثْمِ مَنْ ضَيَّعَهُمْ أَوْ حَبَسَ نَفَقَتَهُمْ عَنْهُمْ:
حدیث نمبر: 2312)
ترجمہ:
سیدنا خیثمہ رضی اللہ عنہ نے کہا: ہم عبداللہ بن عمر رضی اللہ عنہما کے پاس بیٹھے تھے کہ ان کا داروغہ آیا اور انہوں نے پوچھا کہ تم نے غلاموں کو خرچ دے دیا؟ اس نے کہا: نہیں۔ انہوں نے کہا: دے دو، اس لیے کہ رسول اللہ صلی اللہ علیہ وسلم نے فرمایا: ”آدمی کے گنہگار ہونے کے لئے اتنا ہی کافی ہے کہ جس کو خرچ دیتا ہے اس کا خرچ روک دے۔“