سوال: السلام علیکم, مفتی صاحب !ظہور احمد نے اپنے گھر کا سارا کاروبار خود سنبھالا ہوا ہے۔ (یاد رہے کہ والدین اور بہن بھائی سب اس کے ساتھ مل کر رہتے ہیں اور تمام جائیداد کے مالک والد صاحب ہیں) اس تناظر میں پوچھنا یہ ہے کہ کاروبار کے سلسلے میں ظہور احمد کا اندرون ملک و بیرون ملک سفر ہوتا رہتا ہے اور مہمانوں، ہوٹلوں وغیرہ کی مد میں اچھا خاصا خرچہ اس مشترک جائیداد سے ہی ہوتا ہے، تو کیا ظہور احمد کو کھلا خرچ کرنے کی اجازت ہے یا شرعا کوئی حد مقرر ہے؟
نیز کاروبار میں اسے قیمتی تحائف بھی ملتے ہیں، اور چونکہ مارکیٹ میں اس کی اچھی ساکھ ہے، تو لوگ اس کو کاروبار کے لیے الگ سے پیسے بھی دیتے ہیں، تو کیا یہ تحائف اور الگ سے کاروبار کے لیے دیئے گئے پیسے ظہور کی ذاتی ملکیت شمار ہوں گے یا ان پیسوں کو مشترک جائیداد میں شمار کیا جائے گا؟

جواب: واضح رہے جو اولاد اپنے والد کے ساتھ ایک ہی گھر میں رہائش پذیر ہو، ان کا کھانا پینا ایک ساتھ ہو، اور ان کا ذریعہ معاش بھی ایک ہی ہو(یعنی والد کے ساتھ رہنے والے بیٹے، اپنے والد ہی کے ساتھ ان کے کاروبار اور کام میں ان کے مددگار و معاون ہوں)، تو ایسی صورت میں شرعا تمام اولاد والد کی خادم اور معاون تصور ہوتی ہے، پھر اگر والد صاحب نے اپنے بڑے بیٹے کو تمام ذمہ داریاں سونپ رکھی ہیں، خود صرف سرپرستی فرماتے ہیں، تب بھی بڑا بیٹا جو بھی تصرف کرے گا اس کی حیثیت اپنے والد کے معاون اور وکیل کی ہوگی، لہذا جو لوگ بھی اس کو کاروبار کے لیے سرمایہ فراہم کرتے ہیں، تو وہ بیٹا اس کاروبار کا مالک نہیں بنے گا، بلکہ وہ اپنے والد کے وکیل کے طور پر ہی ہر معاملہ کرے گا۔
جہاں تک بات ہے تحائف اور ھدایا کی، تو اگر بڑے بیٹے کو جو تحائف اور ھدایا اس کی اپنی معرفت سے ملتے ہیں، وہ ان کو اپنے ذاتی استعمال میں رکھ سکتا ہے، لیکن اگر اس کو وہ تحفہ اس کے والد کے لیے ہی دیا گیا ہے، تو پھر اسے اپنے پاس رکھنا درست نہیں ہے۔