سوال: کیا یہ بات درست ہے کہ در حقیقت التحیات اس مکالمے کا ایک حصہ ہے، جو دوران معراج اللہ رب العزت اور اس کے محبوب محمد ﷺ کے مابین ہوا، چناںچہ جب حضرت محمد ﷺ اللہ رب العزت سے ملے تو آپ ﷺ نے السلام علیکم نہیں کہا، بھلا کوئی اس ذات کو کیسے سلام کہے، جو بذات خود پیکر سلام ہے؟ ہم اسے سلام نہیں کرسکتے، کیونکہ ساری سلامتیوں کا خالق تو وہ خود ہے، لہذا رسول اللہ ﷺ نے عرض کیا: التحیات للہ والصلوات والطیبات تمام زبان کی بدنی اور مالی عبادات اللہ کیلیے ہیں، اللہ سبحانه وتعالیٰ نے جواباً ارشاد فرمایا: السلام علیک ایھا النبی ورحمة اللہ وبرکاته اے اللہ کے نبی! آپ پر اللہ کا سلام اور برکتیں ہوں، اس کے جواب میں رسول اللہ ﷺ نے فرمایا: السلام علینا وعلی عباد اللہ الصالحین سلام ہو ہم پر اور اللہ کے صالح بندوں پر، اللہ عزوجل اور اس کے حبیب ﷺ کے مابین یہ مکالمہ سن کر فرشتوں نے کہا: اشھد ان لا اله الا اللہ واشھد ان محمد عبدہ ورسوله میں گواہی دیتا ہوں کہ اللہ کے سوا کوئی معبود نہیں، اور میں گواہی دیتا ہوں کہ حضرت محمد صلی اللہ علیہ وسلم اللہ کے بندے اور اس کے پیغمبر ہیں۔
(بحوالہ بخاری ومسلم مظاہر حق جدید، شرح مشکوۃ شریف، باب: تشہد کا بیان، صفحہ ۵٨٨ تا ۵٩٣)

جواب: متداول کتبِ حدیث میں یہ واقعہ تو نہیں ملا، البتہ بعض سیرت اور فقہ کی کتابوں میں یہ واقعہ مذکور ہے۔
علامہ آلوسی نے اپنی تفسیر روح المعانی میں "سلام قولا" کے تحت، علامہ بدر الدین عینی نے ابو داؤد کی شرح "شرح سنن ابو داؤد میں، ملا علی قاری نے اسے "مرقاۃالمفاتیح" میں، اور عسقلانی نے "تبیین الحقائق شرح کنز الدقائق" میں اس واقعہ کو لکھا ہے، لیکن کسی نے بھی اس واقعہ کو سند کے ساتھ ذکر نہیں کیا۔
اس لیے اس واقعہ کی نسبت نبی صلی اللہ علیہ وسلم کی طرف کرنا درست نہیں ہے۔